“গুৱাহাটীৰ খোৱাপানী যোগানৰ সমস্যাটোক এটা নিৰ্বাচনী ইচ্ছ্যু হিচাপে ব্যৱহাৰ কৰি আহিছে প্ৰতিটো ৰাজনৈতিক দলে। কিন্তু নিৰ্বাচন পাৰ হৈ যোৱাৰ পাছত বিষয়টো গুৰুত্বহীন হৈ পৰে।” -এই মন্তব্য অসম সংগ্ৰামী মঞ্চৰ সাধাৰণ সম্পাদক সমৰজ্যোতি বেজবৰুৱাৰ।
আজি ৩ আগষ্টত দলটোৰ গুৱাহাটীৰ মুখ্য কাৰ্যালয়ত এখন সংবাদমেল সম্বোধন কৰি বেজবৰুৱাই কয় যে মহানগৰীত পানীযোগান আঁচনিসমূহৰ কাম অতি লেহেমীয়া গতিত চলি আছে। ইয়াৰ আঁৰত এচাম প্ৰভাৱশালী লোকৰ চক্ৰান্তও নিহিত থকাৰ সন্দেহ ব্যক্ত কৰে তেওঁ।
“JNNURM, JICA, AUIIP ৰ অন্তৰ্গত গুৱাহাটী মহানগৰীত চলি থকা পানীযোগান আঁচনিৰ কাম লেহেমীয়া গতিত আগ বঢ়াৰ আঁৰত এচাম দুৰ্নীতিগ্ৰস্ত আমোলা আৰু প্ৰভাৱশালী ৰাজনীতিকৰ স্বাৰ্থ নিহিত হৈ আছে। AUIIP ৰ অন্তৰ্গত ২০১৫ চনৰ ২৯ জুলাইত আহ্বান কৰা নিবিদা সম্পৰ্কে অনুষ্ঠানটোৱে যোৱা প্ৰায় ছাৰে তিনি বছৰতকৈও অদিক কাল কোনো সিদ্ধান্ত ল’ব নোৱৰা এক নিৰুপায় অৱস্থাটোৱেই তাৰ উৎকৃষ্ট উদাহৰণ।” এইদৰে কয় বেজবৰুৱাই।
তেওঁ লগতে এচাম উচ্চপদস্থ আমোলা আৰু শাসনাধিষ্ঠিত চৰকাৰৰ প্ৰভাৱশালী নেতাৰ প্ৰত্যক্ষ হস্তক্ষেপত এই আঁচনিৰ কামৰ আৱণ্টন দিয়া হোৱা নাই বুলিও আপত্তি দৰ্শায়।
ইপিনে, সন্দেহজনক প্ৰতিষ্ঠানক নিবিদাৰ কাম আৱণ্টন দিয়াৰ বাবে নিৰ্বাচন কৰা বুলি এক অভিযোগ উত্থাপন কৰে সাধাৰণ সম্পাদক বেজবৰুৱাই। GDCL-JKM-BSEE নামৰ অন্যতম সহযোগী ফাৰ্ম M/S GDCL নামৰ ফাৰ্মখনৰ বিষয়ে বিভিন্ন আপত্তিজনক তথ্য লাভ কৰা বুলি তেওঁ সংবাদমেলত প্ৰকাশ কৰে। লগতে চত্তিছগড়, মধ্য প্ৰদেশ আদি ৰাজ্যত এই ফাৰ্মে নিম্নমানৰ কাম কৰা বুলিও তেওঁ জানিবলৈ দিয়ে।
“মধ্য প্ৰদেশ চৰকাৰৰ গড়কাপ্তানী বিভাগে ২০১৮ চনৰ ৯ মে’ তাৰিখে এক জাননীযোগে এই ফাৰ্মখনৰ পঞ্জীয়ন দুবছৰৰ বাবে বাতিল কৰিছে। অসমতো NHIDCL ৰ অন্তৰ্গত চাৰিলেনযুক্ত মৰাণ-ডিমৌ পথৰ কামতো এই প্ৰতিষ্ঠানটোৱে হেমাহি কৰাৰ তথ্য সংবাদ মাধ্যমত প্ৰকাশিত হৈছে। এই ধৰণৰ প্ৰতিষ্ঠানক আমি কিমান গ্ৰহণযোগ্য বুলি ভাবিব পাৰো”, তেওঁ কয়।
ইয়াৰ উপৰি আজিৰ সংবাদমেলত অসম সংগ্ৰামী মঞ্চই নিৰ্বাচনৰ পূৰ্বে ‘গুৱাহাটীবাসী ৰাইজৰ বাবে ২৪ ঘণ্টাই খোৱাপানী যোগান ধৰা’ প্ৰতিশ্ৰুতিৰ বিষয়টো আঙুলিয়াই দি এই সম্পৰ্কত এখন পূৰ্ণাংগ শ্বেতপত্ৰ প্ৰকাশৰো দাবী জনায়। লগতে খোৱাপানী যোগান আঁচনিৰ কাম লেহেমীয়া হৈ থকা বিষয়টোৰ মুখ্য মন্ত্ৰীক এক তদন্তৰ ব্যৱস্থা কৰাৰো দাবী জনায়।
