দেশী-বিদেশী সুৰাৰ পয়োভৰ ঘটা মাজুলীত আৰক্ষী-আবকাৰী বিভাগৰ অভিযান
অবৈধ সুৰাৰ অবাধ স্থলিলৈ ৰূপান্তৰ হৈছে সত্ৰপীঠ মাজুলী। ১৪ জুনত আবকাৰী আৰু আৰক্ষীৰ এক যুটীয়া অভিযানকাৰী দলে মাজুলীৰ বিভিন্ন স্থানত অভিযান চলাই বৃহৎ পৰিমাণৰ দেশী-বিদেশী সুৰা জব্দ কৰাৰ লগতে কেইবাটাও সুৰাৰ ঘাটি নষ্ট কৰে।
মাজুলীৰ অতিৰিক্ত আৰক্ষী অধীক্ষক অমৰ চৌধুৰী আৰু সহকাৰী আয়ুক্ত নিতিশা বৰাৰ নেতৃত্বত গৰমপুৰ আৰক্ষী থানাৰ ভাৰপ্ৰাপ্ত বিষয়া ৰঞ্জন দলেৰ লগতে আবকাৰী বিভাগৰ চাৰ্কোল ইন্সপেক্টৰ অৰুন জে ভৰালীয়ে বালিচাপৰি, চিলাকলা, চেলেক আৰু ধূনাগুৰি অঞ্চলত অভিযান চলাই বৃহৎ পৰিমানৰ অৰুণাচলত তৈয়াৰী বিদেশী সুৰা, বিয়েৰ জব্দ কৰাৰ লগতে প্ৰায় ১৫০ লিটাৰ দেশীয় সুৰা নষ্ট কৰে।
উল্লেখ্য যে অভিযানকাৰী দলটোৱে বালিচাপৰি আৰু ধূনাগুৰি অঞ্চলত অভিযান চলাওতে মাৰাত্মক দ্ৰব্যও জব্দ কৰা পৰিলক্ষিত হয়। এই দ্ৰব্য সমূহ দেশীয় সুৰা নিৰ্মাণ কৰোতে ব্যৱহাৰ কৰে বুলি ব্যৱসায়ীসকলে জানিবলৈ দিয়ে।
আনহাতে অভিযানৰ সময়ত প্ৰত্যেকটো অঞ্চলতে স্থানীয় লোকৰ সৈতে অভিযানকাৰী দলটোৱে মত বিনিময় কৰি সুৰাৰ ব্যৱহাৰ স্বাস্থ্যৰ বাবে সৰ্বাধিক ক্ষতিকাৰক বুলি কোৱাৰ লগতে এনেধৰণৰ ব্যৱসায়ৰ বিৰুদ্ধে সতৰ্ক হ’বলৈ অনুৰোধ জনায়।