বিগত ১৬ মাহ ধৰি দৰমহাৰ পৰা বঞ্চিত হৈ থকা নগাওঁ কাগজ কলৰ ঠিকা ভিত্তিক অস্থায়ী শ্ৰমিকসকলে আজি কাগজ কলটোৰ মূল প্ৰৱেশদ্বাৰত প্ৰতিবাদ সাৱ্যস্ত কৰে।
জাগীৰোডস্থিত নগাওঁ কাগজ কলটোৰ শ্ৰমিকসকলে ৰঙালী বিহুৰ প্ৰাক্ক্ষণত দৰমহা আদায়ৰ দাবীত এই প্ৰতিবাদী কাৰ্যসূচী পালন কৰে। চৰকাৰৰ উদাসীনতা আৰু কাগজ কল কৰ্তৃপক্ষৰ মইমতালিৰ ফলস্বৰূপে বিগত প্ৰায় ৩০ বছৰ ধৰি কাগজ কলটোত কৰ্মৰত ২০০ অস্থায়ী কৰ্মচাৰীৰ ভৱিষ্যত অন্ধকাৰ হৈ পৰিছে।
জানিব পৰা মতে উক্ত কৰ্মচাৰীসকলৰ পাঞ্চিং মেচিন উঠাই নিয়া কাগজ কলটোৰ উচ্চ পদস্থ বিষয়া কেইগৰাকীয়ে যড়যন্ত্ৰমূলকভাৱে কৰ্মচাৰীসকলক বিপদৰ মাজলৈ ঠেলি দিয়াৰ অভিযোগ উত্থাপন হৈছে।
কাগজ কল কৰ্তৃপক্ষই ১০ এপ্ৰিলত উক্ত কৰ্মচাৰীসকলক দৰমহা আদায় দিয়াৰ লগতে পাঞ্চিং মেচিন পুনৰ স্থাপন কৰাৰ প্ৰতিশ্ৰুতি দিছিল যদিও সেয়া কাৰ্যকৰী নকৰিলে।
সেয়ে অস্থায়ী কৰ্মচাৰীসকলে আজি কাগজ কলটোৰ মুখ্য প্ৰৱেশদ্বাৰত প্ৰতিবাদ সাব্যস্ত কৰি তেওঁলোকৰ ক্ষোভ উজাৰে। বুধবাৰৰ ভিতৰত দৰমহা আদায় নিদিলে অস্থায়ী কৰ্মচাৰীসকলে বৃহস্পতিবাৰৰ পৰা জংগী আন্দোলন গঢ়ি তোলাৰ হুংকাৰ দিয়ে।
বৰ্তমান উৎপাদন বন্ধ হৈ থকা নগাওঁ আৰু কাছাৰ কাগজ কলটো পুনৰ উজ্জীৱিতকৰণৰ বাবে গঠন কৰি দিয়া উপ-কমিটিয়ে যোৱা ফেব্ৰুৱাৰীতে কাগজ কল দুটাক ব্যক্তিগত খণ্ডক গতাই দিয়াৰ পূৰ্বে কৰ্মচাৰীসকলৰ ৩ মাহৰ দৰমহা মুকলি কৰি দিয়াৰ সিদ্ধান্তৰ কথা ঘোষণা কৰিছিল।
উল্লেখযোগ্য যে গুৰু উদ্যোগ তথা ৰাজহুৱা খণ্ডৰ উদ্যোগ মন্ত্ৰী অনঁত জি গীতেই হিন্দুস্তান পেপাৰ ক’ৰপৰেশ্যনৰ অধীনস্থ নগাওঁ আৰু কাছাৰ কাগজ কল দুটাক ব্যক্তিগত খণ্ডক গতোৱা হ’ব বুলি যোৱা ফেব্ৰুৱাৰীত সদৰী কৰিছিল।
