বাটেশ্বৰ এখন গাঁৱৰ নাম। আগ্ৰাৰ পৰা ৮০ কিলোমিটাৰ নিলগত যমুনা নদীৰ পাৰৰ এখন সৰু গাঁও বাটেশ্বৰ।বাটেশ্বৰৰ কোনো বিশেষ স্মৃতি নাই কেৱল প্ৰাক্তন প্ৰধানমন্ত্ৰী অটল বিহাৰী বাজপেয়ীৰ নাম এই গাঁৱৰ লগত জড়িত। বাজপেয়ীৰ স্মৃতি এতিয়াও এই গাঁৱৰ ধূলিৰ মাজত ৰৈ আছে। কিন্তু, বিজেপিৰ প্ৰতিষ্ঠাপক বাজপেয়ীৰ গাঁৱত আজিকোপতি নিৰ্মাণ হোৱা নায় এখন মহাবিদ্যালয়৷
বাজপেয়ীৰ আত্মীয় এতিয়াও বাটেশ্বৰত থাকে। উত্তৰ প্ৰদেশ চৰকাৰে বাৰে বাৰে প্ৰতিশ্ৰুতি দি থাকিলেও ইয়াত চৰকাৰী মহাবিদ্যালয় নাই। এইবাৰো একেই প্ৰতিশ্ৰুতি দিছে বিজেপিয়ে। গতিকে প্ৰয়াত প্ৰধানমন্ত্ৰীৰ আত্মীয়ই আশা এৰিব বিচাৰিছে। ৭৫ বছৰীয়া মংগলচৰণ শুক্লাই কয় যে যোগী আদিত্যনাথ ২০১৮ চনৰ ৮ ছেপ্টেম্বৰত বাজপেয়ীৰ মূৰ্তিত সেৱা অৰ্পণ কৰিবলৈ আহিছিল। সেইদিনা মহাবিদ্যালয় নির্মাণকে ধৰি কেইবাটাও প্রতিশ্রুতি দিছিল৷ অৱশ্যে আজিও সেয়া পূৰণ হোৱা নাই। তেওঁৰ মতে, এতিয়া বিজেপিয়ে বাজপেয়ীৰ জন্মদিন (২৫ ডিচেম্বৰ) আৰু মৃত্যুৰ দিন (১৬ আগষ্ট)তহে স্মৰণ কৰে।
এই গাঁৱৰ বহুতেই জানে যে এদিন বাজপেয়ীৰ দেউতাকে আজগাওঁ এৰি গোৱালিয়ৰলৈ গৈছিল ল’ৰা-ছোৱালীৰ শিক্ষাৰ বাবে।বৰ্তমান আগ্ৰাৰ যোগী চৰকাৰৰ উচ্চ শিক্ষামন্ত্ৰী যোগেন্দ্ৰ উপাধ্যায় বাটেশ্বৰৰ বিধায়ক। বাজপেয়ীয়ে শৈশৱৰ কেইবাবছৰ এইখন গাঁৱতে কটাইছিল। প্ৰধানমন্ত্ৰী হোৱাৰ পাছত মাত্ৰ এবাৰহে গাঁৱলৈ উভতি আহিছিল। লগতে তেওঁ গাঁৱৰ ৰাইজক বহু সেৱাৰ প্ৰতিশ্ৰুতি দিছিল।
বাটেশ্বৰত ভোটাৰৰ সংখ্যা মাত্ৰ ৭ হাজাৰ। সকলোৰে এটাই দাবী চৰকাৰী মহাবিদ্যালয়। দশম শ্ৰেণীৰ পাছত পঢ়িবলৈ ওচৰতে স্কুল নাই। ইয়াৰ পাছত পঢ়া-শুনা কৰিব বিচাৰিলে প্ৰতিদিনে ১২ কিঃমিঃ দূৰলৈ যাত্ৰা কৰিব লাগে।অঞ্চলটোত উচ্চতৰ মাধ্যমিক বিদ্যালয় আৰু মহাবিদ্যালয়ৰ চাহিদা দীৰ্ঘদিনীয়া। যোৱা বছৰ মুখ্যমন্ত্ৰী আদিত্যনাথে ইয়ালৈ আহি ভাৰতৰত্ন অটল বিহাৰী বাজপেয়ী সংস্কৃত কেন্দ্ৰ উদ্বোধন কৰিছিল।
