ধৰ্ষণকাৰীৰ বিৰুদ্ধে বজালী মহাবিদ্যালয় চৌহদত এবিভিপিৰ প্ৰতিবাদ : কঠোৰ আইন প্ৰণয়নৰ দাবী
অখিল ভাৰতীয় বিদ্যাৰ্থী পৰিষদৰ বজালী শাখাৰ লগতে বজালী মহাবিদ্যালয় গোটৰ কৰ্মীসকলে বৰপেটা জিলাৰ পাঠশালাৰ বজালী মহাবিদ্যালয় চৌহদত শনিবাৰে ধৰ্ষণকাৰীৰ বিৰুদ্ধে প্ৰতিবাদত এক মৌন সমদল উলিয়ায়।
অখিল ভাৰতীয় বিদ্যাৰ্থী পৰিষদৰ বজালী শাখা আৰু বজালী মহাবিদ্যালয় গোটে যুটীয়াভাৱে আয়োজন কৰা প্ৰতিবাদী কাৰ্যসূচীত প্ৰদৰ্শন কৰা প্লেকাৰ্ডসমূহত লিখা আছিল ‘ড’ন্ট টেল মি হাউ টু ড্ৰেছ’, ‘টেল ডেম নট টু ৰেপ,’ ‘নাৰীৰ দাম দেশত সমান’, ‘নাৰীৰ সুৰক্ষা নিশ্চিত কৰক’ ইত্যাদি।
এবিভিপিৰ কৰ্মীসকলে বৰপেটা জিলাৰ অন্তৰ্গত বজালী মহকুমা আৰু অসমৰ অন্যান্য স্থানত বৃদ্ধি পোৱা ধৰ্ষণৰ ঘটনাৰ বিৰুদ্ধে প্ৰতিবাদ সাৱ্যস্ত কৰে।
প্ৰতিবাদকাৰীসকলে ধৰ্ষণকাৰীৰ বিৰুদ্ধে কঠোৰ আইন প্ৰণয়ন কৰিবলৈ চৰকাৰক দাবী জনায়।
বজালী মহাবিদ্যালয় ছাত্ৰ সংস্থাৰ সাধাৰণ সম্পাদক ৰাকেশ তালুকদাৰে কয়,’’ভাৰতত মহিলাৰ বিৰুদ্ধে প্ৰতিদিনে অপৰাধ সংঘটিত হয়। ঘৰতেই হওক বা ৰাজহুৱা স্থানতেই হওক মহিলাসকল সুৰক্ষিত নহয়। অসমত মহিলাৰ বিৰুদ্ধে অপৰাধৰ সংখ্যা বৃদ্ধি পোৱালৈ চাই অৰণাচল প্ৰদেশৰ দৰে অসমতো কঠোৰ আইন প্ৰস্তুত কৰিব লাগে।‘’
উল্লেখযোগ্য যে অলপতে অৰুণাচল প্ৰদেশে শিশু ধৰ্ষণৰ বাবে মৃত্যুদণ্ডৰ শাস্তিত অনুমোদন জনাই এখন আইন গৃহিত কৰি দেশৰ চতুৰ্থখন ৰাজ্য হিচাপে পৰিগণিত হৈছে।
অপৰাধ আইন (অৰুণাচল প্ৰদেশ) সংশোধনী বিধেয়ক-২০১৮ খন অৰুণাচল প্ৰদেশ ৰাজ্য বিধানসভাত সকলো সদস্যৰ উপস্থিতিত সৰ্বসন্মতভাৱে মৌখিক ভোটত গৃহিত হয়।
ইয়াৰ আগেয়ে একেধৰণৰ বিধেয়ক বিজেপি শাসিত তিনিখন ৰাজ্য মধ্য প্ৰদেশ, হাৰিয়ানা আৰু ৰাজস্থানত গৃহিত হৈছিল।