নগাঁও চহৰৰ মাজমজিয়াত বনকৰা যুৱতীয়ে সন্ত্ৰাস চলাৱোৰ ঘটনা এটা সংঘটিত হৈছে। গৃহস্থক সংজ্ঞাহীন কৰি সৰ্বস্ব লুটি নিয়া ঘটনাই সমগ্ৰ নগাঁৱতে চাঞ্চল্যৰ সৃষ্টি কৰিছে।
জানিব পৰা মতে, শুকুৰবাৰে নিশা নগাঁও চহৰৰ মাজমজিয়াৰ ঢাকাইপট্টিৰ বিমলা বৰা পথৰ ৰাফেল আহমেদৰ ঘৰত এই ঘটনা সংঘটিত হয়।
জিলাখনৰে জুৰীয়া অঞ্চলৰ ৰেজিয়া নামৰ বনকৰা যুৱতীগৰাকীয়ে ৰাফেল আহমেদৰ ঘৰৰ ছগৰাকী সদস্যক খাদ্যত বিষ মিহলাই সেৱনেৰে সংজ্ঞাহীন কৰি ঘৰৰ সকলো সা-সম্পত্তি লৈ যায়।
আনকি বনকৰা যুৱতীগৰাকীয়ে ঘৰৰ কুকুৰটোকো সংজ্ঞাহীন কৰিছিল। অসুস্থ ব্যক্তি কেইগৰাকীক নগাঁও অসামৰিক চিকিৎসালয়ত ভৰ্ত্তি কৰোৱা হয় যদিও বহু সময়লৈকে সংজ্ঞাহীন হৈ আছিল। বৰ্তমান তেওঁলোকে কিছু সম্বিৎ ঘূৰাই পাইছে।
কিন্তু তেওঁলোক চিকিৎসালয়ত থকা হেতুকে ঘৰৰ পৰা কি কি সম্পত্তি লৈ বনকৰা ছোৱালীজনী উধাও হ’ল তেওঁলোকে একো ক’ব পৰা নাই।
ঘটনা সন্দৰ্ভত আৰক্ষীয়ে তদন্ত আৰম্ভ কৰিছে যদিও বনকৰা ছোৱালীজনীক আটক কৰিবলৈ সক্ষম হোৱা নাই।
