নাগৰিকত্ব বিধেয়কৰ বিৰুদ্ধে ওদালগুৰিত খিলঞ্জীয়াৰ অধিকাৰ সমিতিৰ প্ৰতিবাদ

ৰাজ্যখনৰ সৰ্বত্ৰে নাগৰিকত্ব (সংশোধনী) বিধেয়ক, ২০১৬ বলৱৎ কৰাৰ বিৰুদ্ধে প্ৰতিবাদ চলি থকাৰ সময়তে কেইটামান খিলঞ্জীয়া সংগঠনেও প্ৰতিবাদী কাৰ্যসূচী হাতত লৈছে।

খিলঞ্জীয়াৰ অধিকাৰ সমিতি (Society for Indigenous People’s Rights)নামৰ খিলঞ্জীয়া লোকৰ অধিকাৰ সুৰক্ষিত কৰিব বিচৰা নৱগঠিত সংগঠন এটাই বিতৰ্কিত বিধেয়কখন বাতিলৰ দাবীত বিশাল প্ৰতিবাদী শোভাযাত্ৰা বাহিৰ কৰে। শুকুৰবাৰে এই প্ৰতিবাদী শোভাযাত্ৰটো চহিদ বেদীৰ পৰা আৰম্ভ কৰি ওদালগুৰিৰ উপায়ুক্তৰ কাৰ্যালয়ৰ চৌহদলৈ যাত্ৰা কৰিছিল।

ওদালগুৰিৰ বিভিন্ন বিদ্যালয় আৰু কনিষ্ঠ বিদ্যালয়ৰ ছাত্ৰ-ছাত্ৰীসকলে এই শোভাযাত্ৰাত অংশগ্ৰহণ কৰিছিল। খিলঞ্জীয়াৰ অধিকাৰ সমিতিৰ কৰ্মকৰ্তাসকলে ওদালগুৰি জিলা উপায়ুক্তৰ কাৰ্যালয়ৰ যোগেদি প্ৰধান মন্ত্ৰী নৰেন্দ্ৰ মোদীলৈ সম্বোধন কৰা স্মাৰকপত্ৰখন দণ্ডাধীশৰ হাতত অৰ্পণ কৰিছিল।

স্মাৰকপত্ৰখনত কোৱা হৈছে যে ধৰ্মৰ ভিত্তিত কোনো বিদেশীকেই অসমে গ্ৰহণ নকৰে। হিন্দু বাংলাদেশীক নাগৰিকত্ব প্ৰদান কৰাটো খিলঞ্জীয়া লোকৰ অস্তিত্বৰ প্ৰতি এটা ভাবুকি বুলিও এই স্মাৰকপত্ৰখনত কোৱা হয়। এই কাৰ্যসূচীত খিলঞ্জীয়াৰ অধিকাৰ সমিতিৰ জিলা সভাপতি বঞ্জৰ চন্দ্ৰ ব্ৰহ্ম আৰু সাধাৰণ সম্পাদক ডেমফু দৈমাৰীয়েও অংশগ্ৰহণ কৰিছিল।