নিৰাপত্তাজনিত কাৰণত শিৱসাগৰ চহৰৰ ব্যস্ততাপূৰ্ণ এলেকাত সংস্থাপন কৰিব চিচি টিভি
শিৱসাগৰ জিলা উপায়ুক্ত পল্লৱ গোপাল ঝাই জিলাখনৰ বিভিন্ন বিভাগৰ অধীনত চলি থকা কাম কাজৰ অগ্ৰগতিৰ বুজ লোৱাৰ উদ্দেশ্যে ৯ জানুৱাৰিত জিলা উপায়ুক্তৰ চুকাফা সভাকক্ষত জিলা উন্নয়ন সমিতিৰ এক বৈঠক অনুষ্ঠিত কৰে।
জিলা উপায়ুক্তৰ অধ্যক্ষতাত অনুষ্ঠিত এই বৈঠকত বিভিন্ন বিভাগৰ বিষয়ববীয়া সকল উপস্থিত থাকে। উপায়ুক্ত গৰাকীয়ে বিভিন্ন বিভাগ সমুহৰ অধীনত চলি থকা কাম কাজৰ অগ্ৰগতি সম্পৰ্কে বিষয়া সকলৰ পৰা খতিয়ান লয় আৰু আঁচনিৰ কাম সমূহ ক্ষীপ্ৰতাৰে সম্পন্ন কৰিবৰ বাবে নিৰ্দেশ দিয়ে।
কৃষি বিভাগৰ বিভিন্ন জনকল্যান মূলক আঁচনিৰ বিষয়ে জনসাধাৰণক অৱগত কৰিবলৈ বিষয়া-কৰ্মচাৰী সকলক ৰাইজৰ মাজত গৈ সজাগতা বৃদ্ধিৰ আহ্বান জনায়। ইয়াৰ উপৰি চহৰৰ ব্যস্ততাপূৰ্ণ এলেকাত চিচি টিভি সংস্থাপন কৰিবৰ বাবে মহানগৰ আন্তঃগাথনি উন্নয়ন পুঁজিৰ অধীনত ২৫ লাখ টকা আবন্টন কৰিব পাৰিব বুলি উল্লেখ কৰে।
ইয়াৰ বাবে জিলাৰ আৰক্ষী, ট্ৰেফিক আৰু পৰিবহন এই তিনিটা বিভাগ মিলিত হৈ আলোচনা কৰি এক প্ৰকল্প প্ৰতিবেদন প্ৰস্তুত কৰি শীঘ্ৰে দাখিল কৰিবলৈ আহ্বন জনায়। লগতে জিলাখনত শিশু শ্ৰমিক নিয়োজন বন্ধ কৰাৰ বাবে গঠিত টাস্ক ফ’ৰ্চ ক অধিক শক্তিশালী কৰিবলৈ শ্ৰম বিভাগক যাৱতীয় ব্যৱস্থা ল’বলৈ আহ্বান জনায়।
এই বৈঠকত জিলা উন্নয়ন আয়ুক্ত দায়িত্বপ্ৰাপ্ত অতিৰিক্ত উপায়ুক্ত আল আজহাৰ আলি অতিৰিক্ত উপায়ুক্ত মুন গগৈ, সহকাৰী আয়ুক্ত গৌৰীপ্ৰিয়া দেউৰীৰ লগতে বিভাগ সমূহৰ বিষয়া সকল উপস্থিত থাকে।