ৰাজ্যৰ ৰাজনৈতিক প্ৰেক্ষাপটত অতিকৈ চৰ্চিত আৰু দক্ষ মন্ত্ৰী হিচাপে পৰিচিত ড০ হিমন্ত বিশ্ব শৰ্মা। সঘনাই মত সলনি কৰা অথবা দল সলনি কৰাৰ সন্দৰ্ভত আটাইতকৈ বেছি চৰ্চিত নামটোৱে হৈছে ড০ হিমন্ত বিশ্ব শৰ্মা। বৰ্তমান বিজেপি নেতৃত্বাধীন চৰকৰখনৰ মন্ত্ৰী ড০ হিমন্ত বিশ্ব শৰ্মাৰ একালৰ ৰাজনৈতিক গুৰু প্ৰাক্তন মুখ্য মন্ত্ৰী তৰুণ গগৈৰ প্ৰত্যেকখন সংবাদমেলতে উচ্চাৰণ কৰে হিমন্ত বিশ্বৰ নাম। তাৰ প্ৰত্যুত্তৰতে গগৈৰ এসময়ৰ নয়নৰ মণি মন্ত্ৰীগৰাকীয়ে কটূ ভাষাৰে সমালোচনা কৰে প্ৰাক্তন মুখ্য মন্ত্ৰীগৰাকীক।
এতিয়া তৰুণ গগৈৰ মনত শংকা হৈছে ‘হিমন্ত বিশ্ব শৰ্মা পুনৰ কংগ্ৰেছলৈ ঘূৰি আহিব নেকি?’ আজি এক সংবাদমেলযোগে এই শংকা প্ৰকাশ কৰে প্ৰাক্তন মুখ্য মন্ত্ৰীগৰাকীয়ে।
‘’এসময়ত হিমন্ত মোৰে আটাইতকৈ বেছি ভক্ত আছিল। হিমন্ত বিশ্ব কাইলৈ আকৌ কংগ্ৰেছলৈ ঘূৰি নাহিব, তাৰো ঠিক নাই,‘’-সংবাদমেলত এই মন্তব্য তৰুণ গগৈৰ।
গগৈৰ মতে ‘হিমন্তই কংগ্ৰেছৰ সৈতে এতিয়াও মনে মনে সম্বন্ধ ৰাখি আছে।‘
‘কিন্তু এতিয়া কংগ্ৰেছলৈ আহিলে তেওঁ আকৌ জেইললৈ যাব লাগিব,‘-এইদৰে কয় গগৈয়ে।
অৱশ্যে প্ৰাক্তন মুখ্য মন্ত্ৰীগৰাকীয়ে কংগ্ৰেছলৈ হিমন্ত বিশ্ব শৰ্মা ঘূৰি অহাটো বিচৰা নাই। কাৰণ তেওঁ এতিয়া একালৰ নয়নৰ মণিক কেতিয়াও বিশ্বাসত ল’ব নোৱাৰে।
‘’হিমন্তক যি বিশ্বাস কৰে সি মৰিলে আৰু। হিমন্ত বিশ্বক মই আটাইতকৈ বেছি বিশ্বাস কৰিছিলো, মই বিশ্বাস কৰি মৰিছো। কংগ্ৰেছলৈ ঘূৰি আহিব বিচাৰিলে মই বিৰোধিতা কৰিম, কাৰণ আকৌ হিমন্তই কংগ্ৰেছক ঠগিব,’‘- হিমন্তৰ সন্দৰ্ভত এইদৰে কয় গগৈয়ে।
ইপিনে, এআইয়ুডিএফ প্ৰধান বদৰুদ্দিন আজমলক কটাক্ষ কৰিলেও মন্ত্ৰী হিমন্ত আৰু বিজেপি দলে মনে মনে সম্পৰ্ক ৰখা বুলিও সন্দেহ কৰে গগৈয়ে।
‘হিমন্ত বিশ্বৰ সৈতে আজমলৰ মধুৰ সম্পৰ্ক আছে,‘’-এইদৰে কয় গগৈয়ে।
গগৈৰ মতে ‘’বদৰুদ্দিন আজমলক পানী দি বিজেপিয়ে জীয়াই ৰাখিছে।‘‘
তদুপৰি, বদৰুদ্দিনক জীয়াই ৰাখিলেহে বিজেপিয়ে হিন্দু-মুছলমানৰ ৰাজনীতি কৰিব পাৰিব বুলিও সংবাদমেলত মন্তব্য কৰে গগৈয়ে।
গগৈয়ে লগতে কয়, ‘’যোৱা বিধানসভা নিৰ্বাচনত এআইয়ুডিএফে কংগ্ৰেছৰ সমষ্টিত প্ৰাৰ্থী দি কংগ্ৰেছক হৰুৱালে। এআইয়ুডিএফ জয়ী নোহোৱা সমষ্টিতো প্ৰাৰ্থী দিছিল যোৱা বিধানসভা নিৰ্বাচনত।‘’
আনহাতে, সেই একেখন সংবাদমেলতে নাগৰিকত্ব সংশোধনী বিধেয়কৰ বিৰুদ্ধে প্ৰবল আন্দোলন গঢ়ি তুলিবৰ বাবে ৰাজ্যৰ দল-সংগঠনসমূহক আহ্বান জনায়।
‘’নাগৰিকত্ব সংশোধনী বিধেয়কৰ বিৰুদ্ধে আন্দোলন চলি থাকিব লাগিব, কিন্তু এই আন্দোলন শান্তিপূৰ্ণ হ’ব লাগিব। নাগৰিকত্ব সংশোধনী বিধেয়কৰ বিৰুদ্ধে জেইল ভৰাও আন্দোলন কৰি থাকিব লাগিব। লাখ লাখ মানুহক জেইলত ভৰাওঁক কোনো কথা নাই। প্ৰয়োজন সাপেক্ষে আমি জেইললৈ যাবলৈ সাজু থাকিব লাগিব,’‘- সংবাদমেলত গগৈয়ে এইদৰে কয়।
তদুপৰি, কেন্দ্ৰই লোকসভাত নাগৰিকত্ব সংশোধনী বিধেয়ক গৃহীত কৰি বিভেদ আনিছে বুলিও গগৈয়ে মন্তব্য কৰে।
‘‘ধৰ্মৰ নামত অসমক ভাগ কৰিছে। অসম চুক্তিত ধৰ্মৰ নামত বিদেশী চিনাক্তকৰণৰ কথা কোৱা হোৱা নাছিল। আমাৰ দেশ এতিয়াও ধৰ্মনিৰপেক্ষ,’‘-সংবাদমেলত এই মন্তব্য প্ৰাক্তন মুখ্যমন্ত্ৰী তৰুণ গগৈৰ।
