যেতিয়াই সন্মুখত কোনো নিৰ্বাচন আহি উপস্থিত হয় তেতিয়াই প্ৰদীপ হাজৰিকাই শক্তি প্ৰকল্পৰ কাহিনী আওৰায়। আমগুৰি সমষ্টিৰ সৈতে জড়িত জলন্ত সমস্যাসমূহক আওকান কৰি বিধায়ক গৰাকীয়ে বিধানসভাত অতি সাধাৰণ বিষয়বোৰহে উত্থাপন কৰে। জাঁজীৰ নন্দনবন ৰিজ’ৰ্টত অনুষ্ঠিত এখন সংবাদ মেলত এই অভিযোগ উত্থাপন কৰে অসম প্ৰদেশ কংগ্ৰেছ কমিটিৰ সাধাৰণ সম্পাদক অংকিতা দত্তই।
প্ৰদেশ কংগ্ৰেছৰ সাধাৰণ সম্পাদকগৰাকীয়ে অভিযোগ কৰে যে প্ৰাক্তন বিধায়ক প্ৰয়াত অঞ্জন দত্তৰ কাৰ্যকালত সমষ্টিটোত পথ নিৰ্মাণ, গড়কপ্তানি, আন্তঃগাঁথনিকে ধৰি বৰ্তমান সমষ্টিৰ বিধায়ক প্ৰদীপ হাজৰিকাৰ তুলনাত প্ৰভূত উন্নয়ন সাধিত হৈছিল। পঞ্চায়তত বিধায়কগৰাকীয়ে তৃণমূল পৰ্যায়ত গণতান্ত্ৰিক ব্যৱস্থাটোত ব্যাঘাত জন্মাইছে।
বৰ্তমান নিখিল ভাৰত কংগ্ৰেছ কমিটিৰ নতুন সভাপতি ৰাহুল গান্ধীয়ে আগন্তুক নিৰ্বাচনত দল আৰু ৰাষ্ট্ৰৰ প্ৰতি বিশ্বাসী যুৱ, উদ্যোগী তথা গতিশীল নেতাক অগ্ৰাধিকাৰ দিব। অংকিতা দত্তই বৰ্তমানৰ চৰকাৰখনক তীব্ৰ সমালোচনা কৰি জলন্ত সমস্যাসমূহৰ প্ৰতি তেওঁলোকে উদাসীনতা প্ৰদৰ্শন কৰাৰ অভিযোগ তোলে।
অবৈধ প্ৰব্ৰজন, বৃহৎ নদীবান্ধ, নগা ফ্ৰেমৱৰ্ক চুক্তি আদিকে ধৰি জলন্ত সমস্যাসমূহৰ ক্ষেত্ৰত চৰকাৰখন নীৰৱ হৈ থকাৰ অভিযোগ তুলি দত্তই নিৰ্বাচনৰ সময়ত দিয়া প্ৰতিশ্ৰুতিসমূহ চৰকাৰখনে পূৰণ কৰাত ব্যৰ্থ হোৱা বুলি কয়।
দত্তই মহিলা সবলীকৰণ, এলপিজি সংযোগ আদি ক্ষেত্ৰত মোডী চৰকাৰক সমালোচনা কৰে। বাস্তৱিকতে কংগ্ৰেছে মহিলা সবলীকৰণৰ দিশত কাম কৰিছিল বুলি তেওঁ কয়। কংগ্ৰেছৰ শাসনকালত দেশৰ সৰ্বোচ্চ সন্মান ৰাষ্ট্ৰপতি পদত মহিলাক নিৰ্বাচিত কৰাৰ লগতে অধ্যক্ষ আৰু বহু ৰাজ্যত মুখ্যমন্ত্ৰী হিচাপে মহিলাক নিৰ্বাচিত কৰিছিল বুলি দত্তই ব্যক্ত কৰে।
অংকিতা দত্তই আগন্তুক পঞ্চায়ত নিৰ্বাচনৰ ৰণশিঙা বজাই ঘোষণা কৰে যে তৃণমূল পৰ্যায়ত কংগ্ৰেছৰ সাংগঠনিক শক্তি এতিয়াও শক্তিশালী। পঞ্চায়ত নিৰ্বাচনত তেওঁলোকে স্থানীয় সমস্যা আৰু ৰাইজৰ অভিযোগসমূহত গুৰুত্ব দিব বুলি দত্তই ব্যক্ত কৰে।
