পুনৰ ঘটিল যাত্ৰা বিভ্ৰাট! লণ্ডন অভিমুখী এয়াৰ ইণ্ডিয়াৰ বিমানত যান্ত্ৰিক বিজুতি ধৰা পৰে। দিল্লী বিমানবন্দৰৰ পৰা লণ্ডনৰ হিথ্ৰ’ বিমানবন্দৰলৈ উৰা মৰাৰ আগতেই এই যান্ত্ৰিক ত্ৰুটি ধৰা পৰে। ফলত বৃহস্পতিবাৰে এই যান্ত্ৰিক ত্ৰুটি বাবে এয়াৰ ইণ্ডিয়াৰ এআই২০১৭ বিমানখন ৰাণৱেৰ পৰা ঘূৰাই অনা হয়।
জানিব পৰা মতে, যাত্ৰীসকলক আন এখন বিমানেৰে লণ্ডনলৈ পঠোৱাৰ ব্যৱস্থা কৰা হৈছে।
বাতৰি মতে, বৃহস্পতিবাৰে দিনৰ ১:২৫ বজাত এই বিমানখন দিল্লীৰ পৰা যাত্ৰা কৰাৰ কথা আছিল। যাত্ৰীসকলৰ সৈতে ৰাণৱেৰ পৰা উৰা মাৰিবলৈও সাজু হৈছিল। অৱশ্যে সেই সময়তে পাইলটসকলে যান্ত্ৰিক সমস্যাটো লক্ষ্য কৰে। বাতৰি অনুসৰি বিমানখন বয়িং সংস্থাৰ।
এয়াৰ ইণ্ডিয়াৰ এগৰাকী মুখপাত্ৰই জনোৱা মতে, দিল্লীৰ পৰা লণ্ডন অভিমুখী AI2017 বিমানখনত যান্ত্ৰিক বিজুতি ধৰা পৰা বুলি অনুমান কৰা হৈছে। ককপিটৰ ক্ৰুৱে ষ্টেণ্ডাৰ্ড অপাৰেটিং প্ৰচিডিউৰ (এছ অ’ পি) অনুসৰণ কৰি বিমানখন বাতিল কৰাৰ সিদ্ধান্ত লয়।
সতৰ্কতামূলক পৰীক্ষাৰ বাবে পাইলটসকলে বিমানখন ঘূৰাই আনিছিল। মুখপাত্ৰগৰাকীয়ে লগতে কয় যে যাত্ৰীসকলৰ অসুবিধা দূৰ কৰিবলৈ লণ্ডনলৈ বিকল্প বিমানৰ ব্যৱস্থা কৰা হৈছে।
এয়াৰ ইণ্ডিয়াৰ এগৰাকী মুখপাত্ৰই জনোৱা মতে, যাত্ৰীসকলক অতি সোনকালে লণ্ডনলৈ লৈ যোৱাৰ বাবে বিকল্প বিমানৰ ব্যৱস্থা কৰা হৈছে। তেওঁ কয়, “আমাৰ গ্ৰাউণ্ড ষ্টাফে যাত্ৰীসকলক সকলো ধৰণৰ সহায় আগবঢ়াইছে। যাত্ৰীসকলৰ ভালদৰে যত্ন লোৱা হৈছে আৰু তেওঁলোকৰ সুবিধাসমূহৰ সম্পূৰ্ণ যত্ন লোৱা হৈছে।”
