শেহতীয়াভাৱে জিলা সদৰ হাফলঙৰ পৰা স্থানান্তৰিত কৰা হল সৰ্বশিক্ষাৰ অধীনৰ অধিকাংশ ব্ল’ক মিশ্যনৰ কাৰ্যালয়। জিলা সদৰৰ পাঁচটা ব্ল’ক কাৰ্যালয়ৰ ভিতৰত মাইবাঙ, দিয়ুঙব্ৰা আৰু মাহুৰ ব্ল’ক হাফলং কাৰ্যালয়ত তলা ওলোমাই সংশ্লিষ্ট এলেকাত কাৰ্যালয় নতুনকৈ স্থাপন কৰিছে কৰ্তৃপক্ষই।
যোৱা ২০ এপ্ৰিল তাৰিখে ‘নৰ্থ ইষ্ট নাও’ত হাফলঙৰ সৰ্বশিক্ষা অভিযান মিশ্যনৰ পাঁচটা ব্ল’ক মিশ্যনৰ কাৰ্যালয় এটা দশক ধৰি বিভিন্ন কাৰণত ইয়াৰ পৰাই পৰিচালিত হৈ থকাৰ বাতৰি প্ৰকাশ পাইছিল আৰু এই বাতৰি প্ৰকাশৰ লগে লগে সৰ্বশিক্ষা মিশ্যনৰ ভিতৰচৰাত হুৱাদুৱা লাগে। বাতৰি প্ৰকাশৰ এদিন পাছত জিলা মিশ্যন সমন্বয়ক এল জেদ নামপুইয়ে এক নিৰ্দেশনা দিয়ে য’ত নামপুইয়ে অনতিপলমে সংশ্লিষ্ট ব্ল’ক কাৰ্যালয় হাফলঙৰ পৰা নিজ নিজ এলেকাত স্থানান্তৰ কৰাৰ কথা উল্লেখ কৰে।
অবশ্যে, ডিএমচিৰ নিৰ্দেশ পোৱাৰ লগে লগে তিনিটা বিএমচি কাৰ্যালয় ক্ৰমে মাইবাঙ, দিয়ুঙব্ৰা আৰু মাহুৰ নিজৰ স্থানলৈ উভতি যোৱাৰ লগতে এতিয়া হাৰাঙ্গাজাও আৰু চাঙবাৰ ব্ল’ক কাৰ্যালয়ো স্থানান্তৰ কৰাৰ যো-জা চলি আছে। আনহাতে, এনে নিৰ্দেশৰ পাছত ব্লকৰ কৰ্মী সকল সমস্যাত পৰিছে। কিয়নো আটাইবোৰ ব্ল’কৰ অধিকাংশতে বেছিভাগ কৰ্মচাৰী হাফলঙৰ আৰু এনে পৰিস্থিতিত জিলা সদৰ হাফলং এৰি মাইবাঙ, মাহুৰ বা দিয়ুঙব্ৰাত কৰ্তব্য সম্পাদন কৰাটো মূৰৰ কামোৰণি হৈ পৰিছে।
ইপিনে সৰ্বশিক্ষা মিছনৰ অধীনত ছাত্ৰ-ছাত্ৰী সকলৰ মাজত বিনামূলীয়া পোছাক যোগান ধৰাক লৈও দুৰ্নীতিৰ অভিযোগ উত্থাপিত হৈছে।
