পুনৰ জীয়াই তুলিব লাগিব ঐতিহ্যমণ্ডিত সৰ্থেবাৰীৰ ‘কাঁহ শিল্প’ । সৰ্থেবাৰীৰ ‘কাঁহ শিল্প’ জাতিৰ শৈল্পিক স্বাভিমানৰ প্ৰতীক। অকল কাঁহ শিল্পই নহয় সকলো থলুৱা উদ্যোগসমূহক নতুন মাত্ৰা প্ৰদান কৰিব লাগিব। ইয়াৰ বাবে চৰকাৰে পৰ্যাপ্ত ব্যৱস্থা গ্ৰহণ কৰিছে। এই মন্তব্য ৰাজ্য চৰকাৰৰ উদ্যোগ আৰু পৰিবহন মন্ত্ৰী চন্দ্ৰমোহন পাটোৱাৰীৰ।
উল্লেখ্য যে বৃহস্পতিবাৰ অৰ্থ্যাৎ ২১ জুনত বৰপেটা জিলাৰ সৰ্থেবাৰীত অসম কঁহাৰ শিল্পী সন্থাই আয়োজিত এখন সভাত উপস্থিত থাকি মন্ত্ৰী পাটোৱাৰীয়ে এই মন্তব্য কৰে।
বৰপেটা জিলাৰ উপায়ুক্ত থানেশ্বৰ মালাকৰৰ সভাপতিত্বত অসম কঁহাৰ শিল্পী সন্থাৰ কাৰ্যালয়ত অনুষ্ঠিত হোৱা সভাত পাটোৱাৰীয়ে কয় যে সৰ্থেবাৰীক মহকুমাৰ প্ৰয়োজন। স্বাধীনতাৰ পাছত গঠিত কোনো এখন এখন চৰকাৰে ৰাজ্যৰ উদ্যোগ খণ্ডটোৰ বিষয়ে নাভাবিলে। কিন্তু বৰ্তমানৰ সৰ্বানন্দ সোণোৱাল চৰকাৰে এই ক্ষেত্ৰত তৎপৰতা প্ৰদৰ্শন কৰাটো ৰাজ্যৰ ক্ষুদ্ৰ উদ্যোগ খণ্ডৰ বাবে শুভ লক্ষণ।
আনহাতে চলিত বছৰত নিবনুৱা যুৱক-যুৱতীসকলক স্বাৱলম্বিতাৰ বাবে এক লাখৰ পৰা দুই লাখ টকালৈ ঋণ আগবঢ়োৱা হ’ব বুলি উল্লেখ কৰাৰ লগতে সৰ্থেবাৰীৰ কাঁহ শিল্পৰ উন্নয়নৰ বাবে সকলো ব্যৱস্থা গ্ৰহণ কৰিব বুলি উল্লেখ কৰে।
উল্লে্খ্য যে সভাত উপস্থিত থকা উদ্যোগ মন্ত্ৰী চন্দ্ৰমোহন পাটোৱাৰীৰ লগতে বৰপেটা জিলাৰ উপায়ুক্ত থানেশ্বৰ মালাকৰ, উদ্যোগ আৰু বাণিজ্য বিভাগৰ বৰপেটাৰ জি এম কৃষ্ণমোহন দাসক ফুলাম গামোচা, কাঁহৰ বঁটাৰে সম্বৰ্ধনা জনায়।
