নামনি অসমত উদ্যোগ স্থাপনৰ প্ৰতি লক্ষ্য ৰাখি আমিনগাঁৱৰ পৰা টিহুলৈকে ৰাষ্ট্ৰীয় ঘাইপথৰ দুয়োকাষে ঔদ্যোগিক কৰিডৰ স্থাপন কৰিব। সোমবাৰে বিধানসভাৰ শুণ্যকালীন সময়ত এই কথা কয় ৰাজ্যৰ উদ্যোগ বিভাগৰ দায়িত্বত থকা মন্ত্ৰী চন্দ্ৰমোহন পাটোৱাৰীয়ে।
ইয়াৰ উপৰি কালি সদনত কংগ্ৰেছৰ বিধায়ক আব্দুল খালেকে উত্থাপন কৰা অশোক কাগজ কল সন্দৰ্ভত মন্ত্ৰীগৰাকীয়ে তেওঁৰ উত্তৰত কয় যে দীৰ্ঘদিন ধৰি বন্ধ হৈ থকা কাগজ কলটো পুনৰুজ্জীৱিত কৰি তোলাৰ বাবে বিভিন্ন সময়ত ব্যৱস্থা গ্ৰহণ কৰি আহিছে যদিও ইয়াক ফলপ্ৰসু কৰাত ব্যৰ্থ হয়। তেওঁ লগতে কয় যে কেন্দ্ৰীয় চৰকাৰৰ এক বিশেষজ্ঞৰ দলে কলটো সন্দৰ্ভত অভ্যয়ন চলাই কৈছিল যে অশোক কাগজ কল পুনৰুজ্জীৱিত কৰাটো কাৰিকৰী তথা অৰ্থনৈতিকভাবে লাভান্বিত নহয়।
বিশেষক্ষৰ সেই প্ৰতিবেদনৰ পিছতে এতিয়া ৰাজ্য চৰকাৰে নিজাববীয়াকৈ কিছু ব্যৱস্থা গ্ৰহণৰ সিদ্ধান্ত লৈছে। আমি কেন্দ্ৰীয় চৰকাৰৰ সহযোগত কলটোৰ চৌহদত সংহত অৰ্থনৈতিক মণ্ডল প্ৰতিষ্ঠা কৰাৰ সিদ্ধান্ত গ্ৰহণ কৰিছো। মণ্ডলৰ নাম অশোক কাগজ কলৰ নামেৰে নামাকৰণ কৰা হ’ব।
আনহাতে এই সন্দৰ্ভতে মন্ত্ৰীজনে আৰু কয় যে নতুনকৈ স্থাপন হ’বলগীয়া মণ্ডলটোত চৰকাৰ আৰু ব্যক্তিগত খণ্ডৰ যৌথ প্ৰচেষ্টাত ৬৫০০ কোটি টকা বিনিয়োগ কৰা হ’ব। মণ্ডলটোত এটা নতুনকৈ কাগজ কল, অট’ম’বাইল হাব, তথ্য প্ৰযুক্তি হাব, আৰু ঔদ্যোগিক পাম স্থাপন কৰিব বুলি সংসদত জানিবলৈ দিয়ে বিভাগীয় মন্ত্ৰীজনে।
লক্ষ্যণীয় যে আব্দুল খালেকে বিষয়টো উত্থাপন কৰি কয় যে নামনি অসমত বঙাইগাঁও তেল শোধনাগাৰৰ বাহিৰে আন কোনো উদ্যোগ নাই। যিমানবোৰ ৰাজহুৱা খণ্ডৰ উদ্যোগ আছিল সেইসকল ইতিমধ্যে নিষ্ক্ৰিয় হৈ পৰিছে। সেয়েহে চৰকাৰে অশোক কাগজ কল পুনৰুজ্জীৱিত কৰাটো নামনি অসমৰ বাবে অতিশয় প্ৰয়োজনীয়।
