পুৰীৰ সাগৰত ডুবি মৃত্যুবৰণ কৰা সুমন নাথৰ মৃতদেহ আজি পুৱা উৰিষ্যা আৰক্ষীয়ে উদ্ধাৰ কৰিছে। ত্ৰিপুৰাৰ ধৰ্মনগৰ নিবাসী সুমন নাথে তেওঁৰ পত্নী, কন্যা আৰু বন্ধু প্ৰদীপ দেবনাথৰে সৈতে বন্ধৰ দিন উপভোগ কৰাৰ বাবে ৬ তাৰিখে পুৰীত উপস্থিত হৈছিল।
পুৰীৰ সাগৰ তীৰত উপস্থিত হৈ সুমনে তেওঁৰ বন্ধু প্ৰদীপ দেবনাথৰ সৈতে পুৰীৰ সাগৰত স্নান কৰাৰ বাবে সাগৰৰ জলৰাশিত প্ৰৱেশ কৰে। সাগৰৰ নীলিম সৌন্দৰ্যই মোহমুগ্ধ কৰা সুমন ক্ৰমে ক্ৰমে সাগৰৰ গভীৰৰ পৰা গভীৰলৈ আগবাঢ়ি যায়। আনহাতে তেওঁৰ পৰিয়াল জিৰণি লোৱাৰ বাবে হোটেলতেই থাকি গৈছিল। কিন্তু অকস্মাতে অহা এটা ডাঙৰ ঢৌৱে সুমনক উটুৱাই লৈ যায় আৰু তেওঁক আৰু বিচাৰি পোৱা নগ’ল।
কিছু সময় বিচাৰ-খোচাৰ কৰাৰ পাছত পৰিয়ালৰ লোকে ঘটনাটো স্থানীয় আৰক্ষীক অৱগত কৰে। আৰক্ষীয়ে আজি পুৱা সুমনৰ মৃতদেহ সাগৰৰ পৰা উদ্ধাৰ কৰে। সুমনৰ মৃত্যুৰ বাৰ্তা পাই বৰ্তমান তেওঁৰ পত্নী তীব্ৰ অভিঘাত অৱস্থাত আছে।
সুমনৰ অকাল মৃত্যুৰ বাতৰি ধৰ্মনগৰ পোৱাৰ লগে লগে তেওঁৰ ওচৰ-চুবুৰীয়াৰ মাজত শোকৰ ছাঁ পৰে।
