পৃথক বড়োলেণ্ড ৰাজ্য গঠনৰ দাবীত দীৰ্ঘদিন ধৰি আন্দোলন অব্যাহত ৰখা এনডিএফবি(প্ৰ)ৰ সৈতে আজি কেন্দ্ৰীয় চৰকাৰে নিয়োগ কৰা মধ্যস্থতাকাৰী এ বি মাথুৰৰ সৈতে নতুন দিল্লীত এখন গুৰুত্বপূৰ্ণ আলোচনা অনুষ্ঠিত হ’ব।
প্ৰথমবাৰৰ বাবে মধ্যস্থতাকাৰী এবি মাথুৰৰ সৈতে হ’বলগীয়া বহু প্ৰতিক্ষিত এই আলোচনাক আদৰণি জনাই তথা আলোচনা ফলপ্ৰসু হোৱাৰ কামনাৰে ২৪ জুনত সন্ধিয়া কোকৰাঝাৰ চহৰত বহুতো লোকৰ অংশগ্ৰহণেৰে হাতে হাতে জোঁৰ লৈ সমদল উলিওৱা হয়৷
এনডিএফবি(প্ৰ), পিজেএচিবিএম আৰু এবছুৰ যৌথ উদ্যোগত সন্ধিয়া ৬ বজাত কোকৰাঝাৰ চহৰৰ আসাম অইলৰ পৰা আৰম্ভ হোৱা এই বিশাল জোঁৰ সমদলটোৰ অন্ত পৰে বিটিচি সচিবালয় খেলপথাৰত৷
মূলত: কেন্দ্ৰীয় চৰকাৰৰ হৈ মধ্যস্থতাকাৰী এ বি মাথুৰৰ সৈতে এনডিএফবি(প্ৰ)ৰ আলোচনা ফলপ্ৰসু হোৱাৰ কামনাৰে উলিওৱা জোঁৰ সমদলত তিনি সংগঠনৰ কেইবাশতাধিক কৰ্মী,সদস্যই অংশগ্ৰহণ কৰাৰ লগতে সমদলত পিজেএচিবিএমৰ মূখ্য আহ্বায়ক গৌৰ্জন মুছাহাৰী, এবছু নেতা সৌমদন বসুমতাৰী আৰু এনডিএফবিৰ(প্ৰ)ৰ কোকৰাঝাৰ আৰু চিৰাং জিলাৰ বহু শীৰ্ষ পৰ্যায়ৰ নেতা-কৰ্মীয়ে অংশ গ্ৰহণ কৰে৷
