ৰাজ্যত কুখ্যাত সন্ত্ৰাসবাদী সংগঠন আইছিছৰ পতাকা উদ্ধাৰ হোৱাৰ চাঞ্চল্য মাৰ নৌযাওঁতেই নামনি অসম আৰু বৰাক উপত্যকাত হিজবুল মুজাহিদীনৰ সাংগঠিনক তৎপৰতা বৃদ্ধিৰ বাতৰিয়ে সৃষ্টি কৰিছে ব্যাপক প্ৰতিক্ৰিয়াৰ।
শেহতীয়াকৈ অসমত পাকিস্তানৰ সন্ত্ৰাসবাদী সংগঠন হিজবুল মুজাহিদীনে ইছলাম ধৰ্মাৱলম্বী যুৱকসকলক আকৃষ্ট কৰাৰ বাবে বিভিন্ন কৌশল অৱলম্বন কৰাৰ চোৰাংচোৱা প্ৰতিবেদনৰ ভিত্তিত কেন্দ্ৰীয় গৃহ মন্ত্ৰালয়ে ৰাজ্য চৰকাৰক সতৰ্ক কৰি দিছে।কেন্দ্ৰৰ এই সতৰ্কবাণীৰ পাছতে এতিয়া জোকাৰণিৰ সৃষ্টি হৈছে অসম আৰক্ষীত।সম্প্ৰতি চোৰাংচোৱাৰ প্ৰতিবেদনৰ ভিত্তিত কেন্দ্রীয় গৃহ মন্ত্র্যালয়ে ৰাজ্য চৰকাৰলৈ হাই এলার্ট জাৰি কৰিছে৷
উল্লেখযোগ্য যে চোৰাংচোৱা বিভাগে কেন্দ্ৰীয় গৃহ মন্ত্ৰালয়ক দাখিল কৰা প্ৰতিবেদন অনুসৰি হিজবুল মুজাহিদীন নামৰ কুখ্যাত সন্ত্ৰাসবাদী সংগঠনটোৱে অসমৰ সংখ্যলঘু অধ্যুষিত অঞ্চল ধুবুৰী, বৰপেটা আৰু খাৰুপেটীয়াত শ্লীপাৰ চেলৰ সদস্যভৰ্তিৰ বাবে আৰম্ভ কৰিছে তীব্ৰ অভিযান। ইয়াৰ বাবে সংগঠনটোৱে জেহাদৰ বাবে মুছলমান যুৱকসকলক উদ্দেশ্যি বিতৰণ কৰিছে বিভিন্ন প্ৰচাৰ পত্ৰিকাৰ।
অসম আৰক্ষীৰ শীৰ্ষ সূত্ৰই প্ৰকাশ কৰা অনুসৰি ৰাজ্যত পূর্বতকৈ অধিক তৎপৰ হৈছে হিজবুল মুজাহিদীন, জামাতুল মুজাহিদীন অৱ বাংলাদেশ চমুকৈ জে এম বি আৰু মালটা আদি ইছলামিক সন্ত্ৰাসবাদী সংগঠন৷
আফগানিস্তানৰ সন্ত্রাসবাদী সংগঠন তালিবান, বিশ্বত্রাস আল-কায়দা আৰু আইছিছৰ কার্যকলাপৰ প্রতি সমর্থন ব্যক্ত কৰি বঙালী ভাষাত প্রকাশিত ‘আফগানিস্তানে আমি আল্লাহকে দেখছি’ শীর্ষক পুস্তিকা এখন বঙাইগাঁও, গোৱালপাৰা, ধুবুৰী আদি জিলাত বিতৰণৰ বাতৰি পোহৰলৈ আহিছে৷ ইয়াৰ উপৰি ‘পপুলাৰ ফ্রণ্ট অৱ ইণ্ডিয়া’ নামৰ সাম্প্রদায়িক সংগঠনটোৱে ৰাজ্যৰ বাংলাদেশী মূলৰ মুছলমান অধ্যুষিত এলেকাসমূহত সাম্প্রদায়িক বিষবাষ্প বিয়পাই মুছলমান যুৱকক সন্ত্রাসবাদী সংগঠনৰ প্রতি আকর্ষিত কৰিবলৈ চেষ্টা চলাইছে৷ সমাজ সেৱাৰ অচিলা লৈ এই সংগঠনটোৱে সন্ত্রাসবাদী গোটৰ ‘শ্লিপাৰ চেল’ হিচাপে কাম কৰি অহাৰ বাতৰিৰ ভিত্তিতে পপুলাৰ ফ্রণ্ট অৱ ইণ্ডিয়াৰ সন্দেহজনক গতি-বিধিৰ ওপৰত অসম আৰক্ষীয়ে তীক্ষ্ন দৃষ্টি ৰাখিছে৷
যমুনামুখৰ কামেৰ উজ জামান নামৰ যুৱক এজন হিজবুল মুজাহিদীনত যোগদানৰ বাতৰিয়ে প্রতিক্রিয়াৰ সৃষ্টি কৰাৰ সময়তে হিজবুল মুজাহিদীনৰ এই কুচকাৱাজ চিন্তনীয়।
ইতিমধ্যে ছ’চিয়েল মিডিয়াত চকু ৰাখিবলৈ অসম আৰক্ষীয়ে এটা বিশেষ গোট গঠন কৰিছে৷ অহা ১ জুনৰ পৰা সাম্প্রদায়িক মন্তব্যৰে বিদ্বেষ সৃষ্টি কৰাসকলৰ বিৰুদ্ধে পোনছাটেই গোচৰ ৰুজু কৰিব অসম আৰক্ষীয়ে৷ সংখ্যালঘু অধ্যুষিত কেইখনমান জিলাত খোপনি পোতাৰ চেষ্টা কৰি থকা হিজবুল মুজাহিদীনৰ কাৰ্যকলাপ ৰোধ কৰাৰ বাবে অসম আৰক্ষীয়ে প্ৰতিখন জিলাৰ আৰক্ষীৰ অধীক্ষকসকলক অভিযান চলোৱাৰ নিৰ্দেশ দিছে।
