হাতী-মানুহৰ সংঘাতত এগৰাকী মহিলাই মৃত্যুক আকোৱালী লোৱা খবৰে পুনৰ বাক্সা জিলাত শোকৰ ছাঁ পৰিছে। আজি পুৱতি নিশা জিলাখনৰ লাবদাংগুৰিত এটা বনৰীয়া হাতীয়ে অচম্বিতে মহিলা এগৰাকীক আক্ৰমণ কৰাত মহিলাগৰাকীৰ মৃত্যু ঘটে। মৃত মহিলাগৰাকী সুখদা ডেকা(৭৫) বুলি জানিব পৰা গৈছে। স্থানীয় লোকে জনোৱা অনুসৰি হাতীটো মানাস ৰাষ্ট্ৰীয় উদ্যানৰ পৰা খাদ্যৰ সন্ধানত লাবদাংগুৰি অঞ্চলত প্ৰৱেশ কৰিছিল। প্ৰাপ্ত খবৰ অনুসৰি মৃত মহিলাগৰাকীয়ে লাবদাংগুৰিস্থিত জোৱায়েকৰ ঘৰত ফুৰিবলৈ আহিছিল। এই দু:খবৰ বিয়পি পৰাৰ লগে লগে মৃতকৰ ঘৰত যথেষ্ট সংখ্যক লোকে আহি ভিৰ কৰা দেখা যায়।
উল্লেখযোগ্য যে খাদ্যৰ সন্ধানত জাক-জাক বনৰীয়া হাতীয়ে বনাঞ্চলৰ পৰা লোকালয়লৈ নামি আহি বিভিন্ন খাদ্য শস্যৰ খেতি পথাৰ সমূহ তহিলং কৰাৰ ফলত মানুহৰ সৈতে সংঘাতৰ সৃষ্টি হয়। ইয়াৰ ফলতে মানুহ আৰু বনৰীয়া হাতীয়ে অস্বাভাবিক মৃত্যুক আঁকোৱালি ল’ব লগীয়া হয়। তথ্য অনুসৰি চলিত বছৰতে হাতীৰ আক্ৰমণত এই পৰ্যন্ত ৮৭ গৰাকী, ২০১৫ চনত ১১৮ গৰাকী আৰু ২০১৬ চনত ১১০ গৰাকী লোকে প্ৰাণ হেৰুৱাব লগীয়া হৈছে।
