বাংলাদেশীয়ে টালি-টোপোলা বন্ধাৰ বাবে মোদীয়ে ধাৰ্য্য কৰা ১৬ মে’ৰ দিনটোতে কংগ্ৰেছৰ গণপ্ৰতিবাদ
নাগৰিকত্ব সংশোধনী বিধেয়কৰ বিৰুদ্ধে ৰাজ্যৰ চাৰিওফালে প্ৰতিবাদ আন্দোলন অব্যাহত থকাৰ সমান্তৰালকৈ আজি অসম প্ৰদেশ কংগ্ৰেছৰ গুৱাহাটী মহানগৰ জিলা সমিতিয়ে গণ প্ৰতিবাদৰ কাৰ্য্যসূচী ৰূপায়ণ কৰে।
প্ৰতিবাদকাৰী সকলে হাতে হাতে কংগ্ৰেছৰ পতাকা লৈ গুৱাহাটীৰ দীঘলীপুখুৰীৰ পাৰৰ পৰা এক প্ৰতিবাদী সমদল বাহিৰ কৰে।
এই প্ৰতিবাদী সমদলত প্ৰাক্তন মন্ত্ৰী অকন বৰা, কংগ্ৰেছ নেত্ৰী ববিতা শৰ্মা, মহিলা প্ৰদেশ কংগ্ৰেছৰ সম্পাদক হিৰন্ময়ী ফুকন, জুৰি শৰ্মা বৰদলৈ আৰু গুৱাহাটী মহানগৰ জিলা সমিতিৰ জেষ্ঠ্য নেতা-নেত্ৰীবৰ্গই অংশগ্ৰহণ কৰে। লগতে যুব কংগ্ৰেছৰ মহানগৰ জিলা সমিতিয়েও এই সমদলত অংশগ্ৰহণ কৰে।
কংগ্ৰেছ নেত্ৰী ববিতা শৰ্মাই কয়, “১৬ মে’ৰ পিছত মোদীয়ে এজনো বাংলাদেশী অসমত নাথাকিব বুলি কৈছিল। কিন্তু আজি ১৬ মে’ৰ দিনাখনেই আমি বাংলাদেশী ভাৰতলৈ অনাৰ বিৰুদ্ধে প্ৰতিবাদ কৰিব লগীয়া হোৱাটো অত্যন্ত দুৰ্ভাগ্যজনক কথা।”
“যিজন জাতীয় নায়কে অসম চুক্তিৰ জন্ম দিছিল তেৱেঁই আজি নাগৰিকত্ব সংশোধনী বিধেয়ক গৃহীত কৰাৰ বাবে ষড়যন্ত্ৰত নামি পৰিছে।” এইদৰে কয়, মহিলা প্ৰদেশ কংগ্ৰেছৰ সম্পাদক হিৰন্ময়ী ফুকনে।
প্ৰতিবাদী সমদলত অংশগ্ৰহণ কৰা প্ৰাক্তন মন্ত্ৰী অকন বৰাই বিধেয়কখন বাতিলৰ দাবী কৰাৰ লগতে অসম চুক্তিৰ ভিত্তিত নাগৰিকত্ব প্ৰদান কৰিবৰ বাবে কেন্দ্ৰীয় চৰকাৰক আহ্বান জনায়।
প্ৰতিবাদকাৰীসকলে জিলা উপায়ুক্তৰ কাৰ্য্যালয়ৰ সন্মুখত অতিৰিক্ত জিলা উপায়ুক্তক সাক্ষাৎ কৰি বিধেয়কখন বাতিল কৰাৰ দাবী সম্বলিত এখন স্মাৰক পত্ৰ প্ৰদান কৰে। জিলাৰ উপায়ুক্তৰ জৰিয়তে যুটীয়া সংসদীয় কমিটিৰ অধক্ষ্য ৰাজেন্দ্ৰ আগৰৱাললৈ এই স্মাৰকপত্ৰ প্ৰেৰণ কৰা হৈছে বুলি প্ৰতিবাদত ভাগ লোৱা কংগ্ৰেছৰ নেতাসকলে সংবাদ মাধ্যমক অৱগত কৰে।
উল্লেখযোগ্য যে যোৱা ১৩ মে’ৰ দিনাও কংগ্ৰেছৰ গুৱাহাটী মহানগৰ জিলা কমিটিৰ উদ্যোগত গণ স্বাক্ষৰ অভিযান অনুষ্ঠিত হৈছিল।