কেন্দ্ৰীয় গৃহ মন্ত্ৰী ৰাজনাথ সিঙে মেঘালয়ৰ পূব গাৰোপাহাৰ জিলাৰ চংচকত আজি এক নিৰ্বাচনী জন সমাৱেশত ভাগ লৈ কালি এন চি পি প্ৰাৰ্থী জনাথন চাংমাৰ হত্যা ঘটনাটোৰ বাবে শাসনাধিষ্ঠিত কংগ্ৰেছ চৰকাৰক তীব্ৰ সমালোচনা কৰে আৰু বিজেপিক শাসনলৈ আনিলে ৰাজ্যখনত উন্নয়নৰ নতুন যুগ সৃষ্টি হ’ব বুলি প্ৰতিশ্ৰুতি দিয়ে।
কালিৰ ঘটনাটো সন্দৰ্ভত ৰাজ্য চৰকাৰক সমালোচনা কৰি মন্ত্ৰীজনে কয় যে ‘মুকুল চাংমাই যে মেঘালয়ৰ ৰাইজক নিৰাপত্তা দিয়াত ব্যৰ্থ হৈছে তাৰ এক প্ৰমাণ হ’ল এন চি পি প্ৰাৰ্থীজনৰ ওপৰত হোৱা আক্ৰমণ।’
‘মেঘৰ আলয়’ মেঘালয়ত ৰাজনাথ সিঙৰ মতে ‘উন্নয়নৰ বৰষুণ হ’ব লাগে’।
কংগ্ৰেছ শাসনত থাকিলে উন্নয়ন কেতিয়াও নহ’ব বুলি দাবী কৰি নেতাজনে বিজেপি শাসনলৈ আহিলে ‘প্ৰত্যেক ঘৰলেকে ২ বছৰৰ ভিতৰত বিদ্যুৎ যোগান ধৰা হ’ব’ বুলি প্ৰতিশ্ৰুতি দিয়ে।
তুৰা-শ্বিলং সংযোগী নৱনিৰ্মিত ৰাষ্ট্ৰীয় ঘাইপথৰ কৃতিত্ব দাবী কৰি মন্ত্ৰীজনে কয় ‘কেন্দ্ৰই মেঘালয়ৰ পথ মেৰামতিৰ বাবে প্ৰচুৰ ধন যোগান ধৰিছে, কিন্তু ৰাজ্যই নিজৰ কৰ্তব্য পালনত ব্যৰ্থ হৈছে।’
‘দেশৰ ভিতৰতে আটাইতকৈ বেছি বৰষুণ হোৱা ৰাজ্যখনত এবাল্টি পানীৰ বাবে লোকসকলে কেবাঘণ্টা খোজ কাঢ়িব লগা হয়’ বুলি উল্লেখ কৰি মন্ত্ৰীজনে প্ৰতিশ্ৰুতি দিয়ে যে বিজেপিক ভোট দি শাসনলৈ আনিলে প্ৰত্যেক ঘৰলেকে পৰিস্কাৰ খোৱা পানী যোগান ধৰা হ’ব।
তেওঁ লগতে ‘মেঘালয়ক স্বাস্থ্যখণ্ডত খৰচ কৰিবলৈ দিয়া ধন খৰচ কৰিব নোৱৰাটো দুৰ্ভাগ্যজনক’ বুলি অভিহিত কৰে।
বিজেপি শাসনলৈ আহিলে ‘বিভিন্ন কেন্দ্ৰীয় আঁচনিসমূহৰ ৰূপায়নত সম্পূৰ্ণ স্ব্চ্ছতা নিশ্চিত হ’ব’ বুলি দাবী কৰি মন্ত্ৰীজনে ৰাজ্যখনৰ সকলো ‘স্বাস্থ্যকেন্দ্ৰ উন্নীতকৰণ’, ‘শ্বিলং অসামৰিক চিকিৎসালয়ক গৱেষণা প্ৰতিষ্ঠানলৈ উন্নীতকৰণ’ আৰু ‘মেঘালয়ত এখন কেন্সাৰ চিকিৎসালয় স্থাপন’ৰ প্ৰতিশ্ৰুতি দিয়ে।
মুকুল চাংমাৰ শাসনকালত মেঘালয়ত দুৰ্নীতি হোৱা বুলি অভিযোগ তুলি কেন্দ্ৰীয় মন্ত্ৰীজনে কয় যে মেঘালয়ত সংঘটিত বিভিন্ন কেলেংকাৰীসমূহৰ তদন্ত চিবিআইক গতোৱা হ’ব।
ৰাজ্যখনৰ ‘৫৭ খন আৰক্ষী থানাৰ মাত্ৰ ৩৯ খনহে চলি’ থকা বুলি উল্লেখ কৰি গৃ্হ মন্ত্ৰীজনে কয় যে ৰাজ্যখনে সেয়ে ‘নাগৰিকসকলক নিৰাপত্তা প্ৰদানত বিফল হৈছে’।
সভাখনত চংচাক, ৰনজেং আৰু ৱিলিয়ামনগৰ সমষ্টিৰ বিজেপি প্ৰাৰ্থী ক্ৰমে টমাচ চাংমা, ৰিকি মাৰাক আৰু সন্তোষ মাৰাকো উপস্থিত আছিল।
সিঙে দক্ষিণ তুৰা সমষ্টিৰ প্ৰাৰ্থী বিলিকিদ চাংমাৰ হৈ তুৰাটো আন এক প্ৰচাৰ সভাত ভাগ লয়।
