বিশ্বনাথত ‘স্বচ্ছতা ৰথ’ উদ্বোধন মন্ত্ৰী ৰিহণ দৈমাৰীৰ
অসম চৰকাৰৰ জনস্বাস্থ্য কাৰিকৰী আৰু সমবায় বিভাগৰ কেবিনেট মন্ত্ৰী ৰিহন দৈমাৰীয়ে আজি বিশ্বনাথ জিলাৰ বাবে স্বচ্ছ সৰ্বেক্ষণ গ্ৰামীণ-২০১৮ৰ ‘স্বচ্ছতা ৰথ’ৰ শুভ উদ্বোধন কৰে।
বিশ্বনাথ চাৰিআলিৰ বীণাপাণি নাট্য মন্দিৰৰ প্ৰাংগনত আয়োজিত এক অনুষ্ঠানত ভাষণ প্ৰদান কৰি মন্ত্ৰীগৰাকীয়ে দেশৰ সৰ্ববৃহৎ স্বচ্ছতা অভিযানৰূপে পৰিগণিত হোৱা স্বচ্ছ সৰ্বেক্ষণ-২০১৮ত অংশগ্ৰহণ কৰি বিশ্বনাথক শ্ৰেষ্ঠ পৰিচ্ছন্ন জিলা হিচাপে গঢ়ি তোলাত সকলোকে সহযোগিতা আগবঢ়াবলৈ আহ্বান জনায়।
উল্লেখযোগ্য যে স্বচ্ছ ভাৰত মিছন (গ্ৰামীণ)ৰ অধীনত জনস্বাস্থ্য কাৰিকৰী বিভাগৰ জিলা জল আৰু অনাময় সমিতিৰ উদ্যোগত সমগ্ৰ দেশৰ লগতে বিশ্বনাথ জিলাতো মাহজোৰা কাৰ্যসূচীৰে বুধবাৰৰ পৰা স্বচ্ছ সৰ্বেক্ষণ গ্ৰামীণ-২০১৮ আৰম্ভ হ’ব।
আনহাতে জিলা উপায়ুক্তৰ সভাগৃহত আয়োজিত এক অনুষ্ঠানত যোৱা ২৭ জুলাই তাৰিখে বিশ্বনাথত এই অভিযান আনুষ্ঠানিকভাৱে উদ্বোধন কৰা হয়। এই অভিযানৰ জৰিয়তে কেন্দ্ৰীয় চৰকাৰে নিযুক্তি দিয়া এক স্বতন্ত্ৰ সংস্থাই দেশত স্বচ্ছ ভাৰত মিছন (গ্ৰামীণ)ৰ কাম-কাজ নিৰীক্ষণ কৰিব আৰু কিছুমান নিৰ্দিষ্ট সূচকৰ ভিত্তিত ৰাজ্য আৰু জিলাসমূহক ৰেংকিং প্ৰদান কৰিব।
‘স্বচ্ছতা ৰথ’ৰ উদ্বোধনী অনুষ্ঠানত আজি বিশ্বনাথৰ উপায়ুক্ত ধীৰাজ জ্যোতি কলিতা, আৰক্ষী অধীক্ষক দিগন্ত কুমাৰ চৌধুৰী, স্থানীয় বিধায়ক প্ৰমোদ বৰঠাকুৰ, অতিৰিক্ত উপায়ুক্ত দিগন্ত বৈশ্য, বিশ্বনাথ চাৰিআলি পৌৰসভাৰ সভানেত্ৰী ৰুলি শৰ্মা, জনস্বাস্থ্য কাৰিকৰী বিভাগৰ বিশ্বনাথৰ কাৰ্যবাহী অভিযন্তা ৰবীন দাসৰ লগতে বিশ্বনাথ জিলাৰ স্বচ্ছ ভাৰত মিছন (গ্ৰামীণ) তথা স্বচ্ছ সৰ্বেক্ষণ গ্ৰামীণ-২০১৮ৰ কৰ্মকৰ্তাসকল উপস্থিত থাকে।