‘বীৰ লাচিত ক্ৰিকেট’ : গুৱাহাটীত প্ৰথমবাৰৰ বাবে আয়োজন অন্য ধৰণে সক্ষমৰ ৰাষ্ট্ৰীয় ক্ৰিকেট প্ৰতিযোগিতা

অন্য ধৰণে সক্ষমসকলৰ বাবে গুৱাহাটীত প্ৰথম বাৰৰ কাৰণে আয়োজন কৰা হৈছে ‘বীৰ লাচিত ক্ৰিকেট’ শীৰ্ষক এক ৰাষ্ট্ৰীয় ক্ৰিকেট প্ৰতিযোগিতা। ৭ৰ পৰা ১০ এপ্ৰিললৈকে গুৱাহাটী বিশ্ববিদ্যালয় খেলপথাৰত প্ৰতিযোগিতাখন অনুষ্ঠিত হ’ব।

অন্য ধৰণে সক্ষম ক্ৰিকেট সংস্থা, অসম (DACA)ৰ উদ্যোগত আৰু ভাৰতৰ শাৰীৰিকভাৱে বাধাগ্ৰস্তসকলৰ ক্ৰিকেট সংস্থা (PCCAI) ৰ সহযোগত আয়োজিত প্ৰতিযোগিতাখনত অসম, ঝাৰখণ্ড, তামিলনাডু, মধ্যপ্ৰদেশ, কৰ্ণাটক আৰু পঞ্জাবে অংশগ্ৰহণ কৰিব।

অন্য ধৰণে সক্ষম ক্ৰিকেট সংস্থা, অসমৰ সভাপতি বৰ্ণালী নাথ গগৈয়ে নৰ্থ ইষ্ট নাওক জনাই যে অসমৰ অন্য ধৰণে সক্ষমসকলক ভাৰতীয় অন্য ধৰণে সক্ষম ক্ৰিকেট দলত খেলিবলৈ সুযোগ প্ৰদান কৰাৰ চেষ্টাতে এই প্ৰতিযোগিতাখন আয়োজন কৰা হৈছে।

উদ্বোধনী অনুষ্ঠানত মুখ্য অতিথি হিচাপে উপস্থিত থাকিবলৈ অসমৰ মুখ্য মন্ত্ৰী সৰ্বানন্দ সোণোৱালক অনুৰোধ কৰা হৈছে বুলি উদ্যোক্তাসকলে এন ই নাওক জানিবলৈ দিয়ে।