দুদিনীয়া ভ্ৰমণসূচী লৈ প্ৰথমবাৰ হাফলঙলৈ যোৱা ৰাজ্যপাল জগদীশ মুখী একাধিক বিতৰ্কত সোমাই পৰা দেখা গৈছে। ভি আই পি সংস্কৃতিৰ নজিৰবিহীন মাত্ৰা প্ৰদৰ্শনেৰে হাফলংবাসীক জ্বলা-কলা খুওৱাৰ পিছতে নিজৰ আজৱ মন্তব্যৰে অঞ্চলটোৰ সচেতন নাগৰিকৰৰ সমালোচনাৰ পাত্ৰ পৰিছে ৰাজ্যপালজন।
উল্লেখযোগ্য যে বুধবাৰে আৱৰ্ত ভৱনত ৰাজ্যপালে বিভিন্ন দল-সংগঠনৰ প্ৰতিনিধিসকলৰ সৈতে বৈঠকত মিলিত হৈছিল আৰু তেতিয়া তেওঁ কৈছিল যে বেছি লিখা-পঢ়া কৰাৰ প্ৰয়োজন নাই। তেওঁ ক্লাছ টে’ন পাছ কৰি বা দ্বাদশ শ্ৰেণী পাছ কৰি ছমাহৰ প্ৰশিক্ষণ লৈ খেতিত ধৰিলেই হ’ল বুলি কৈছিল।
উচ্চ শিক্ষাৰ জৰিয়তে কৰ্মদক্ষতা তথা বিশেষ পৰ্য্যায়ৰ জ্ঞান আহৰণৰ প্ৰয়োজনীয়তা থকাৰ দিনত ৰাজ্যপালৰ দৰে পদবীত থকা লোকৰ এনে অদ্ভুত মন্তব্যই হতাশ কৰিছে সচেতন নাগৰিকক। যিসময়ত সমাজৰ সকলো স্তৰৰ প্ৰায় প্ৰতিজন মানুহেই এটা বৌদ্ধিক জীৱনৰ প্ৰয়োজনীয়তা উপলব্ধি কৰি আহিছে, কৰ্মসংস্থাপনৰ বাবে নহ’লেও ব্যক্তিত্বৰ উত্তৰণৰ বাবেই উচ্চ শিক্ষা অপৰিহাৰ্য্য হৈ পৰিছে, সেই সময়ত ৰাজ্যপালৰ এনে মন্তব্যত আশ্চৰ্য্য প্ৰকাশ কৰিছে সচেতন নাগৰিকসকলে।
ৰাজ্যপালজনৰ এনে টুলুঙা মন্তব্যক লৈ জাঙুৰ খাই উঠিছে ডিমাচা উইমেন ছ’চাইটি। ৰাজ্যপালক তেওঁৰ এই মন্তব্য প্ৰত্যাহাৰ কৰাৰ দাবী জনাইছে উইমেন ছ’চাইটিয়ে। উইমেন ছ’চাইটিৰ সভানেত্ৰী ৰিংমিলা হোজায়ে কয় যে ৰাজ্যপালৰ নিচিনা সাংবিধানিক পদত বহি এনে মন্তব্য কৰাটো দুৰ্ভাগ্যজনক।
উল্লেখযোগ্য যে জগদীশ মুখী নিজেই এজন পি এইচ্চ ডি ডিগ্ৰীধাৰী। আনহাতে তেওঁ এসময়ৰ দিল্লী চৰকাৰৰ উচ্চশিক্ষা মন্ত্ৰীও আছিল।
