যোৱা কেইদিনমানৰ পৰা চলি থকা নেৰানেপেৰা বৰষুণৰ ফলত বৰাক আৰু কুচিয়াৰা নদীৰ পানী বিপদ সীমাৰ ওপৰলৈ বৈ যোৱাত বান পৰিস্থিতিৰ অধিক অৱনতি ঘটিছে। সেয়েহে সম্প্ৰতি ভয়াৱহ ৰূপ লৈছে বৰাক উপত্যকাৰ বানে।
উল্লেখযোগ্য যে বৰাকৰ লগতে উপনৈ মধুৰা, সোণাই, ধলেশ্বৰী, চিৰি, জিৰি,ডলু , জাতিংগা, কাটাখাল আদি নৈৰ বাঢ়নী পানীয়ে বান পৰিস্থিতিয়ে অধিক ভয়াৱহ ৰূপ লৈছে। ইতিমধ্যে ডলু নদীৰ বাঢ়নী পানীৰ প্রবল সোঁতত ৰীণা মূৰা (৪০)নামৰ এজনী মহিলাৰ লগতে লক্ষীপুৰত আন এজন লোক উটি যায়। সম্প্ৰতি শিলচৰৰ বৰাক নদীৰ অন্নপূৰ্ণা ঘাটত বিপদসীমা 19,83 মিটাৰ। আজি পুৱা সাতমান বজাত 21,27 চেন্টিমিটাৰ ওপৰেদি পানী বাগৰিছে।
কাছাৰ জিলাৰ উপায়ুক্ত এছ লক্ষনাণে এই সন্দৰ্ভত কয় যে ডলু নদী পাৰ হ’বলৈ গৈ এজনী মহিলাৰ মৃত্যু হোৱাৰ পাছত আৰু এজন লোকৰ মৃতদেহ উদ্ধাৰ হৈছে। ইতিমধ্যে কাছাৰ জিলাৰ ১২০ খন গাঁও পানীৰ তলত বুৰ গৈছে আৰু প্ৰায় ১৫ হেজাৰ লোক বানৰ কবলত পৰিছে। শিলচৰ চহৰত অতি কমেও প্ৰায় এহেজাৰ লোক চৰকাৰী স্কুলৰ আশ্ৰয় শিবিৰত আশ্ৰয় লৈছে।
তদুপৰি কাটিগৰাৰ শিয়ালটেক এলেকাত আশ্ৰয় শিবিৰ খোলা হৈছে । কাছাৰ জিলাত ২৪ টা গড়কাপ্তানী পথ পানীৰ তলত বুৰ যোৱাত যাতায়াত ব্যৱস্থা বন্ধ ৰখা হৈছে। বৰ্তমানলৈ জিলাখনৰ প্ৰায় পাচঁ শতাধিক হেক্টৰ কৃষি ভূমি বানৰ কবলত পৰিছে। জিলাখনৰ ঠায়ে ঠায়ে মথাউৰি ছিগাৰ উপৰি শিলচৰ চহৰৰ শ্লুইচ গেটৰ ওপৰেদি বাঢ়নী পানী সোমাই অহাত বহু এলেকা পানীৰ তলত বুৰ গৈছে।
