বৰাক উপত্যকাৰ তিনিওখন জিলাৰ বান পৰিস্থিতি চৰজমিন অধ্যয়ন কৰি সাম্প্ৰতিক বান পৰিস্থিতি মোকাবিলা কৰিব পৰাকৈ মুখ্য মন্ত্ৰী সৰ্বানন্দ সোণোৱালে ১০০ কোটি টকাৰ বান সাহায্য ঘোষণা কৰিছে। কালি বিয়লি শিলচৰত উপস্থিত হৈ উপত্যকাটোৰ কৰিমগঞ্জ জিলা আৰু হাইলাকান্দি জিলাৰ বান পৰিস্থিতি পৰ্যালোচনা কৰাৰ উপৰি আজি কাছাৰ জিলাৰ বান পৰিস্থিতিৰো মুখ্য মন্ত্ৰী গৰাকীয়ে বুজ লয়।
মুখ্য মন্ত্ৰী গৰাকীয়ে আজি শিলচৰ নগৰৰ শিৱপুৰত বৰাক নদীৰ দ্বাৰা ক্ষতিগ্ৰস্ত হোৱা শিলচৰ-কালাইন পথ পৰিদৰ্শন কৰে।
তাৰোপৰি মুখ্য মন্ত্ৰী গৰাকীয়ে শিলচৰ নগৰৰ চৰকাৰী বালক উচ্চতৰ মাধ্যমিক বিদ্যালয়ত স্থাপন কৰা বানাক্ৰান্ত সকলৰ আশ্ৰয় শিবিৰ পৰিদৰ্শন কৰি ক্ষতিগ্ৰস্ত লোক সকলৰ সৈতে মত-বিনিময় কৰে।
ইয়াৰ পিছতে মুখ্য মন্ত্ৰী গৰাকীয়ে উপায়ুক্ত কাৰ্যালয়ৰ সভাকক্ষত জিলাখনৰ বিধায়ক সকলৰ উপস্থিতিত বিভিন্ন উচ্চ পদস্থ বিষয়া তথা জিলা মূৰব্বী সকলৰ সৈতে পৰ্যালোচনা কৰি সকলোকে সকলো প্ৰকাৰৰ সহায় সহযোগিতা আগবঢ়াবলৈ নিৰ্দেশ দিয়ে।
আনহাতে চৰকাৰী কাৰ্যালয়ৰ ভিতৰত সোমাই নাথাকি বিষয়া সকলক বান প্ৰভাৱিত অঞ্চল সমূহ চৰজমিন পৰ্যবেক্ষণ কৰি তাৎক্ষণিকভাৱে প্ৰতিবেদন সমূহ প্ৰস্তুত কৰি চৰকাৰৰ ওচৰত দাখিল কৰিবলৈ মুখ্য মন্ত্ৰীয়ে নিৰ্দেশ দিয়ে।
লগতে মুখ্য মন্ত্ৰী সোণোৱালে বানৰ দ্বাৰা প্ৰভাৱিত জীৱ-জন্তু সমূহেও যাতে সম্পূৰ্ণ সেৱা আৰু সুবিধা লাভ কৰিব পাৰে সেইয়া নিশ্চিত কৰিবলৈ পশু পালন বিভাগক নিৰ্দেশ দিয়ে।
এই পৰ্যালোচনা সভাত জলসম্পদ মন্ত্ৰী কেশৱ মহন্ত, বন মন্ত্ৰী পৰিমল শুক্লবৈদ্যৰ উপৰি শিলচৰ, লক্ষীপুৰ, কাটিগঢ়া, উদাৰবন্দ আৰু বৰখলাৰ বিধায়কসকল উপস্থিত থাকে।
