ভাষা কেতিয়াও শিক্ষা গ্ৰহণৰ ক্ষেত্ৰত অন্তৰায় হ’ব নোৱাৰে : মন্ত্ৰী কেশৱ মহন্ত
সদ্য ঘোষিত উচ্চ মাধ্যমিক আৰু উচ্চতৰ মাধ্যমিক চূড়ান্ত পৰীক্ষাত শীৰ্ষ দহটা স্থানৰ ভিতৰত স্থান লাভ কৰা নগাঁও জিলাৰ কীৰ্তিমান ছাত্ৰ-ছাত্ৰী সকলক সোমবাৰে নগাঁও জিলা প্ৰশাসনৰ উদ্যোগত আৰু জিলা শিক্ষা বিভাগৰ সহযোগত অনুষ্ঠিত এক অনুষ্ঠানত সম্বৰ্ধনা জনোৱা হয়।
উল্লেখযোগ্য যে জিলাখনৰ পৰা এইবাৰ উচ্চ আৰু উচ্চতৰ মাধ্যমিক বিদ্যালয়ৰ পৰীক্ষাত স্থান লাভ কৰা মুঠ ১১ গৰাকী কৃতী ছাত্ৰ-ছাত্ৰীক গামোচা, মানপত্ৰ, কিতাপৰ টোপোলা আদিৰে সম্বৰ্ধনা জনোৱা হয়।
জিলা উপায়ুক্তৰ সভাকক্ষত অনুষ্ঠিত এই অনুষ্ঠানত মুখ্য অতিথি হিচাপে অংশ গ্ৰহণ কৰি ৰাজ্যৰ জলসম্পদ, বিজ্ঞান আৰু প্ৰযুক্তিবিদ্যা আদি বিভাগৰ মন্ত্ৰী কেশৱ মহন্তই কয় যে নব্বৈ দশকৰ পৰা অসমত শিক্ষা ব্যৱস্থাৰ যথেষ্ট পৰিবৰ্তন হৈছে। এই সময়ছোৱাত ব্যক্তিগত খণ্ডৰ বহু শিক্ষানুষ্ঠান স্থাপন হৈছে।
তাৰোপৰি ছাত্ৰ-ছাত্ৰীসকলে নিজৰ মাতৃভাষাৰ প্ৰতি গুৰুত্ব প্ৰদান কৰিব লাগিব বুলি উল্লেখ কৰি মন্ত্ৰীগৰাকীয়ে কয় যে ভাষা কেতিয়াও শিক্ষা গ্ৰহণৰ ক্ষেত্ৰত অন্তৰায় হ’ব নোৱাৰে। অৱশ্যে বৰ্তমান প্ৰতিযোগিতাৰ যুগত বাহিৰৰ জগতখনৰ সৈতে ফেৰ মাৰিবলৈ ছাত্ৰ-ছাত্ৰীসকলে ইংৰাজী ভাষা শিকাটো প্ৰয়োজন।
অনুষ্ঠানটোত জিলা উপায়ুক্ত বিশ্বজিৎ পেগু, আৰক্ষী অধীক্ষক শংকৰব্ৰত ৰায় মেধীয়ে অংশ গ্ৰহণ কৰি ছাত্ৰ-ছাত্ৰী সকলক একাগ্ৰতাৰে অধ্যায়নত ব্ৰতী হ’বলৈ আহ্বান জনায়।
আনহাতে উপায়ুক্তগৰাকীয়ে নগাঁও মহাবিদ্যালয়ত চলিত বৰ্ষৰ পৰা ভাৰতীয় প্ৰশাসনিক সেৱা আৰু অসম লোক সেৱা আয়োগৰ বাবে আগ্ৰহী ছাত্ৰ-ছাত্ৰীসকলক ক’চিং কৰাৰ ব্যৱস্থা কৰা হ’ব বুলি জানিবলৈ দিয়ে।