বিশ্বৰ অগ্ৰণী শৈক্ষিক প্ৰতিষ্ঠান লণ্ডনস্থিত কেম্ব্ৰিজ বিশ্ববিদ্যালয়ত কংগ্ৰেছ নেতা ৰাহুল গান্ধীয়ে নিজ ভাষণত ভাৰতীয় গণতন্ত্ৰ আক্ৰমণৰ সন্মুখীন হৈছে বুলি কৰা মন্তব্যই তীব্ৰ প্ৰতিক্ৰিয়াৰ সৃষ্টি কৰিছে। বিশেষকৈ শাসকীয় বিজেপিয়ে গান্ধীৰ এই মন্তব্যৰ প্ৰতিক্ৰিয়াত তেওঁক কঠোৰ সমালোচনা কৰিছে।
লগতে বিজেপিয়ে গান্ধীৰ বিৰুদ্ধে তুলিছে আন এক গুৰুতৰ অভিযোগ। বিজেপিৰ মতে ৰাহুল গান্ধীয়ে ভাৰতৰ ওপৰত আমেৰিকা আৰু ইউৰোপৰ হস্তক্ষেপ বিচাৰিছে। লগতে ৰাহুল গান্ধীয়ে বিদেশৰ মাটিত দেশক লজ্জিত কৰা বুলিও দাবী কৰিছে বিজেপিয়ে।
বিজেপিৰ মুখপাত্ৰ ৰবি শংকৰ প্ৰসাদে এক বিবৃতিত ৰাহুল গান্ধীয়ে ভাষণত ভাৰতৰ গণতন্ত্ৰ, ৰাজনীতি, সংসদ, ৰাজনৈতিক ব্যৱস্থা আৰু ন্যায়িক ব্যৱস্থাক লজ্জিত কৰিব বিচাৰিছে বুলি অভিযোগ কৰে।
প্ৰসাদে এই প্ৰসঙ্গতে ৰাহুল গান্ধীয়ে গণতন্ত্ৰক বচাবলৈ ইউৰোপ আৰু আমেৰিকাই হস্তক্ষেপ কৰা বিচাৰে নেকি বুলিও প্ৰশ্ন তোলে। “যি চৰকাৰেই নহওক কিয়, আমি আমাৰ আভ্যন্তৰীণ বিষয়ত কোনো ধৰণৰ হস্তক্ষেপৰ তীব্ৰ বিৰোধিতা কৰি আহিছো।”— প্ৰসাদে লগতে কয়।
ভাৰতৰ আভ্যন্তৰীণ বিষয়ত কোনো বিদেশী দেশে হস্তক্ষেপ কৰিব নালাগে বুলি উল্লেখ কৰি বিজেপি নেতাগৰাকীয়ে লগতে ৰাহুল গান্ধীৰ এই মন্তব্যৰ ওপৰত কংগ্ৰেছ সভাপতি মল্লিকাৰ্জুন খৰ্গে আৰু পূৰ্ব সভাপতি ছোনিয়া গান্ধীৰ স্পষ্টীকৰণৰ দাবী কৰে।
মল্লিকাৰ্জুন খৰ্গেই নিজকে যদি কংগ্ৰেছৰ নিৰ্বাচিত সভাপতি বুলি অনুভৱ কৰে, তেন্তে গণতন্ত্ৰ পুনৰুদ্ধাৰ কৰিবলৈ আমেৰিকা আৰু ইউৰোপে ভাৰতত হস্তক্ষেপ কৰিব লাগিব বুলি ৰাহুল গান্ধীয়ে কৰা দায়িত্বহীন আৰু লজ্জাজনক মন্তব্যক সমৰ্থন কৰেনে, সেয়া বিজেপিয়ে জানিব বিচাৰে বুলি প্ৰসাদে কংগ্ৰেছ সভাপতিগৰাকীক জবাবদিহি কৰিছে।
তেওঁ লগতে ৰাহুল গান্ধীৰ মন্তব্যক সম্পূৰ্ণ দায়িত্বহীন বুলি উল্লেখ কৰি এই মন্তব্যৰ ওপৰত ছোনীয়া গান্ধীৰ স্থিতি স্পষ্ট কৰিবলৈ বিজেপিয়ে আহ্বান জনাইছে বুলি বিবৃতিটোত উল্লেখ কৰে।
