মহিলা বিশ্ববিদ্যালয় বন্ধ কৰাৰ বিৰুদ্ধে গুৱাহাটীত উত্তাল প্ৰতিবাদ
মহিলা বিশ্ববিদ্যালয় বিলুপ্তিৰ বাবে চৰকাৰে চলোৱা ষড়যন্ত্ৰৰ বিৰুদ্ধে ৰাজ্যজুৰি ক্ষোভৰ জুই জ্বলিছে। যোৰহাটত বিশ্ববিদ্যালয়খনৰ ছাত্ৰীসকলৰ মাজত উদ্গিৰণ হোৱা ক্ষোভৰ অগ্নিশিখা এতিয়া বিয়পিছে ৰাজ্যৰ চুকে-কোণে।
অসম তথা উত্তৰ-পূৰ্বাঞ্চলৰ প্ৰথমখন আৰু একমাত্ৰ মহিলা বিশ্ববিদ্যালয়খনক পূৰ্ণাংগ ৰূপ দিয়াৰ বিপৰীতে ধ্বংস কৰিবলৈ ৰাজ্য চৰকাৰে গ্ৰহণ কৰা হঠকাৰী সিদ্ধান্তৰ বিৰুদ্ধে সমগ্ৰ অসমতে তীব্ৰ প্ৰতিবাদ সাব্যস্ত হোৱা পৰিলক্ষিত হৈছে।
যোৰহাটৰ মহিলা বিশ্ববিদ্যালয় কাৰিকৰী প্ৰতিষ্ঠানলৈ ৰূপান্তৰিত কৰাক লৈ গুৱাহাটী মহানগৰীতো উত্তাল প্ৰতিবাদ হৈ আছে। ঠায়ে ঠায়ে জ্বলিছে শিক্ষামন্ত্ৰীৰ পুত্তলিকা। শ্ৰেণীকোঠা এৰি হাতে হাতে প্লেকাৰ্ড, বেনাৰ লৈ চৰকাৰক ধিক্কাৰ দি ৰাজপথলৈ ওলাই আহিছে হাজাৰ হাজাৰ ছাত্ৰ-ছাত্ৰী। আছু, ছাত্ৰ-মুক্তি, যুৱ-ছাত্ৰ পৰিষদ, এছ এফ আই আদি বিভিন্ন ছাত্ৰ সংগঠনে পৃথকে পৃথকে অব্যাহত ৰাখিছে প্ৰতিবাদ আৰু প্ৰতিক্ৰিয়া।
বৃহস্পতিবাৰে এছ এফ আই, অসম ছাত্ৰ-যুৱ সন্মিলন আৰু নিখিল ভাৰত গণতান্ত্ৰিক মহিলা সমিতিয়ে গুৱাহাটী ক্লাৱৰ পৰা জিলা উপায়ুক্তৰ কাৰ্যালয়লৈ প্ৰতিবাদী সমদল উলিযায়। মহিলা বিশ্ববিদ্যালয়খনৰ মৰ্যাদা অটুট ৰাখিবলৈ সংগঠনকেইটাই দাবী জনায়।
অসম জাতীয়তাবাদী যুৱ-ছাত্ৰ পৰিষদে ৰাজ্য চৰকাৰৰ শিক্ষা বিভাগৰ চৰম ব্যৰ্থতা আৰু মহিলা বিশ্ববিদ্যালয়ৰ স্বীকৃতি বাতিলৰ প্ৰতিবাদত অহা ২৬ মাৰ্চত জিলা আৰু মহকুমাধিপতিৰ কাৰ্যালয়ৰ সন্মুখত অৱস্থান ধৰ্মঘট কাৰ্যসূচীৰ জৰিয়তে প্ৰতিবাদ সাব্যস্ত কৰিব। সংগঠনটোৰ সভাপতি পুতুল দত্ত আৰু সাধাৰণ সম্পাদক পলাশ চাংমায়ে এক প্ৰেছ বিবৃতিৰ জৰিয়তে এই কথা জানিবলৈ দিয়ে।
আনহাতে ডি এছ অ’ৰ গুৱাহাটী মহানগৰী জিলা সমিতিয়েও চৰকাৰৰ এনে হঠকাৰী সিদ্ধান্তৰ বিৰুদ্ধে কালি প্ৰতিবাদ সাব্যস্ত কৰা দেখা গ’ল। জিলা সমিতিৰ আহ্বায়ক পল্লৱ পেগুৱে আমাৰ সাংবাদিকৰ আগত প্ৰকাশ কৰি কয় যে মহিলা বিশ্ববিদ্যালয়খনক কাৰিকৰী প্ৰতিষ্ঠানলৈ ৰূপান্তৰিত কৰিব বিছৰা কাৰ্যক কোনো পদ্ধে মানি লোৱা নহ’ব।
উল্লেখযোগ্য যে নাৰী সবলীকৰণ, বেটী বচাও বেটী পঢ়াও’ শ্ল’গান দিয়া বিজেপি চৰকাৰৰ শ্ল’গান পৰিপন্থী নীতি গ্ৰহণ কৰা ৰাজ্যৰ শিক্ষা বিভাগক সকলোৱে একেমুখে গৰিহণা দিছে। বিশেষকৈ মহিলা বিশ্ববিদ্যালয়খনৰ বিষয়টোক লৈ ৰাজ্যৰ সমুদায় নাৰী শক্তি জাগ্ৰত হোৱাটো অসমৰ সমাজৰ বাবে এক ইতিবাচক দিশ।