বৃহস্পতিবাৰে ১২ঘণ্টীয়া ডিমা হাচাও বন্ধৰ সময়ছোৱাত প্ৰতিবাদকাৰীলৈ মাইবং আৰক্ষীয়ে গুলীচালনা কৰাৰ ফলত গুৰুতৰভাৱে আহত দুজনক উন্নত চিকিৎসাৰ বাবে গুৱাহাটীলৈ অনাৰ পথত মৃত্যু হয়।
গ্ৰেটাৰ নাগালিমত ডিমা হাচাও জিলাক অন্তৰ্ভুক্ত কৰাৰ প্ৰতিবাদত পাঁচটা বিভিন্ন সংগঠনে ১২ ঘণ্টীয়া বন্ধৰ আহ্বান দিছিল।
নিহত দুজনৰ এজন ২৭ বছৰীয়া প্ৰবীণ হাকমাওচা আৰু আনজন ৩৩ বছৰীয়া মৃত্যুঞ্জয় ডাইব্ৰেগেডে বুলি চিনাক্ত কৰা হৈছে।
তথ্য অনুসৰি প্ৰবীণে মূৰত গুৰুতৰভাৱে আঘাত পাইছিল আৰু মৃত্যঞ্জয়ে বুকুত বেয়াকৈ আঘাত পাইছিল।
মৃত্যঞ্জয়ৰ হাফলঙৰ পৰা গুৱাহাটীলৈ অনাৰ পথত লামডিঙত শেষ নিশ্বাস ত্যাগ কৰে।
এইখিনিতে উল্লেখ কৰিব পাৰি যে প্ৰবীণ আৰু মৃত্যুঞ্জয়ক গুৰুতৰ ভাৱে আহত হোৱাৰ পিছত অন্যান্য আহতসকলৰ সৈতে চিকিৎসাৰ বাবে হাফলং অসামৰিক চিকিৎসালয়ত ভৰ্তি কৰোৱা হৈছিল ।
মাইবং ৰে’ল ষ্টেশ্যনত আৰক্ষীৰ গুলীচালনাত মুঠতে ৯ জন ব্যক্তি আহত হৈছিল। বন্ধৰ অংশ হিচাপে প্ৰতিবাদকাৰীসকলে শিলচৰ অভিমুখী ৰে’ল অৱৰোধ কৰিছিল আৰু লগতে বন্ধৰ সময়ত ৰে’ল চলাচল ব্যহত কৰিবলৈ ৰে’ল পথৰ ক্ষতিসাধন কৰিছিল।
গুলীৰ আঘাত পোৱা সকলৰ ভিতৰত আছিল ২৭ বছৰীয়া প্ৰবীণ হাকমাওচা, ৩৩ বছৰীয়া মৃত্যুঞ্জয় ডাইব্ৰেগেডে, ২২ বছৰীয়া বিশাল হোজাই (ডিঙৰ কাষত আঘাত পাইছে), ২৬ বছৰীয়া সুনুজিত ছেঙয়াঙ (সোঁ কৰঙনত আঘাত পাইছে), ১৬ বছৰীয়া থাইছিঙ হোজাই (বুকুৰ সোঁফালে আঘাত পাইছে), ৩৩ বছৰীয়া আল্পনা থাওচেন (সোঁ ভৰিখন ফাটিছে), ১৭ বছৰীয়া মন্দিনী থাওচেন (বাওঁ কৰঙনত আঘাত পাইছে), ২৭ বছৰীয়া ছুৰদি থাওচেন ( সোঁ ভৰিৰ মণিবন্ধনত আঘাত পাইছে) আৰু ৫০ বছৰীয়া থানছিং লাংথাছা ।
ইয়াৰ মাজতে আজি মাইবঙত বৃহস্পতিবাৰে সংঘটিত গুলীচালনাৰ ঘটনাৰ প্ৰতিবাদ জনাই আৰু প্ৰস্তাৱিত গ্ৰেটাৰ নাগালিম সম্পৰ্কত চৰকাৰৰ পৰা লিখিত স্পষ্টীকৰণ বিচাৰি কেইবাটাও সংগঠনে মিলি শুকুৰবাৰে ৰাতিপুৱা ৫ বজাৰ পৰা ৪৮ ঘণ্টীয়া ডিমা হাচাও বন্ধৰ আহ্বান দিছে।
এই বন্ধ ২৮ জানুৱাৰিৰ আবেলি ৫ বজালৈকে চলিব।
৪৮ ঘণ্টীয়া বন্ধৰ সময়ছোৱাত গোটেই ডিমা হাচাও অঞ্চলৰ স্বাভাৱিক জীৱন যাত্ৰা ব্যহত হৈ পৰিছে।
