দুজন যুৱকে প্ৰাণ হেৰুৱাব লগা হোৱা মাইবাং কাণ্ডত বিজেপি-আৰ এছ এছ জড়িত থকা বুলি আজি অভিযোগ উত্থাপন কৰিছে প্ৰদেশ কংগ্ৰেছ নেতা মুকুল শৰ্মাই। হাফলঙৰ ৰাজীৱ ভৱনত আজি অনুষ্ঠিত এক সংবাদমেলত এই মত প্ৰকাশ কৰে প্ৰদেশ কংগ্ৰেছ নেতাজনে।
তেওঁ ৰাইজৰ মাজত অস্থিৰতাৰ সৃষ্টি কৰাৰ বাবে আৰ এছ এছ নেতা জগদম্বা মালক গ্ৰেপ্তাৰ কৰাৰো দাবী জনায়।
নাগালেণ্ডত ডিমা-হাচাও অন্তৰ্ভুক্তিৰ দৰে ‘সংবেদনশীল আৰু জনসাধাৰণৰ আৱেগজড়িত বিষয়ত’ ‘আৰ এছ এছ আৰু তেওঁলোকৰ প্ৰচাৰক জগদম্বা মালৰ হস্তক্ষেপ’ ‘অনাহূত’ বুলিও মন্তব্য কৰে নেতাজনে।
হাফলং অসামৰিক চিকিৎসালয়লৈ গৈ মাইবাং কাণ্ডত আহতসকলৰ অৱস্থাৰ বুজ লোৱা প্ৰদেশ কংগ্ৰেছৰ দলটোৱে এই সংবাদ মেল আয়োজন কৰিছিল।
কংগ্ৰেছী নেতাজনে নিজৰ অধিকাৰ আৰু অসমৰ অখণ্ডতা ৰক্ষাৰ বাবে মূৰ দাঙি ঠিয় দিয়া ডিমাচা হাচাওৰ জনসাধাৰণৰ শলাগ লয়।
শৰ্মাই দুজন লোকে মূল্যৱান জীৱন হেৰুৱাব লগা হোৱা ঘটনাটো ‘সম্পূৰ্ণৰূপে এৰাই চলিব পৰা ঘটনা’ বুলি অভিহিত কৰি জিলা প্ৰশাসন পৰিস্থিতি নিয়ন্ত্ৰণত বিফলতা হোৱাৰ বাবেই এই কাণ্ড সংঘটিত হোৱা বুলি দাবী কৰে।
তেওঁ জিলা উপায়ুক্ত আৰু আৰক্ষী অধীক্ষকৰ ওপৰত নিৰপেক্ষ তদন্ত দাবী কৰে।
স্ংবাদ মেলখনত ডিমা হাচাও জিলা কংগ্ৰেছৰ ভাৰপ্ৰাপ্ত সম্পাদক ৰামান্না বৰুৱা, প্ৰদেশ কংগ্ৰেছৰ সম্পাদক অংকুৰ ৰাজ গগৈৰ লগতে জিলাখনৰ বহুসংখ্যক কংগ্ৰেছ নেতাও উপস্থিতি থাকে।
প্ৰাক্তন মন্ত্ৰী তথা অসমৰ জ্যেষ্ঠ ৰাজনীতিক গোবিন্দ চন্দ্ৰ লাংথাচা স্ত্ৰ’ক হৈ চিকিৎসালয়ত ভৰ্তি কৰিব লগা হোৱা বাবে জিলা কংগ্ৰেছৰ সভাপতি নিৰ্মল লাংথাচা দলটোৰ লগত উপস্থিত থাকিব নোৱাৰিলে।
