ভাৰত চৰকাৰৰ ইলেকট্ৰনিকছ আৰু তথ্য প্ৰযুক্তি মন্ত্ৰ্যালয়ে শীঘ্ৰে মাজুলীত এটা ‘বিজনেছ প্ৰচেছ আউটছ’ৰ্চিং’ (বি পি অ’) আৰম্ভ কৰিবলৈ যাৱতীয় প্ৰস্তুতি চলাইছে।
যোৱা ২ ফেব্ৰুৱাৰিত গুৱাহাটীত কেন্দ্ৰীয় ইলেকট্ৰনিকছ আৰু তথ্য প্ৰযুক্তি মন্ত্ৰী ৰবি শংকৰ প্ৰসাদে মাজুলীত এটা বি পি অ’ কেন্দ্ৰ স্থাপনৰ বাবে মন্ত্ৰ্যালয়টোৱে সিদ্ধান্ত লোৱাৰ কথা ষোঘণা কৰাৰ পিছত উক্ত মন্ত্ৰ্যালয়ৰ অধীনৰ ‘ছফ্টৱেৰ টেকন’ল’জি পাৰ্কছ অব ইণ্ডিয়া’ (এছ টি পি আই)-এ বি পি অ’টো অতি শীঘ্ৰে মুকলি কৰিবলৈ যাৱতীয় প্ৰস্তুতি আৰম্ভ কৰিছে বুলি জানিব পৰা গৈছে।
এই সন্দৰ্ভত কালি অৰ্থাৎ শুক্ৰবাৰে মাজুলীত আহি উপস্থিত হোৱা এছ টি পি আইৰ সঞ্চালক প্ৰধান ড০ ওমকাৰ ৰায়, জেষ্ঠ সঞ্চালক দেৱেশ ত্যাগী আৰু গুৱাহাটীৰ আঞ্চলিক সঞ্চালক প্ৰবীৰ কুমাৰ দাসে কালি সন্ধিয়া মাজুলীৰ উপায়ুক্ত দেৱপ্ৰসাদ মিশ্ৰক সাক্ষাৎ কৰি এক গুৰুত্বপূৰ্ণ আলোচনাত মিলিত হয়।
উক্ত আলোচনাটোত জিলাখনৰ অতিৰিক্ত উপায়ুক্ত নৰেণ দাসেও অংশগ্ৰহণ কৰে।
আনহাতে আলোচনা চলি থকাৰ মাজতে উপায়ুক্ত মিশ্ৰই মাজুলীলৈ দলটো অহাৰ বিষয়ে মুখ্য মন্ত্ৰী সৰ্বানন্দ সোণোৱালক টেলিফোন যোগে অৱগত কৰাত মুখ্য মন্ত্ৰীয়েও এছ টি পি আইৰ সঞ্চালক প্ৰধান ড০ ৰায়ৰ লগত টেলিফোনত এই সন্দৰ্ভত কথা পাতে।
উল্লেখযোগ্য যে বি পি অ’ হৈছে গ্ৰাহকক সেৱা প্ৰদান কৰা নিৰ্দিষ্ট ব্যৱসায়িক প্ৰতিষ্ঠানৰ হৈ গ্ৰাহকক পোনপটীয়া যোগাযোগ স্থাপনৰ তথ্য প্ৰযুক্তিৰ আধাৰিত ব্যৱস্থা।
