জুবিন গাৰ্গৰ আকস্মিক মৃত্যুৰ পিছত নৰ্থ-ইষ্ট ফেষ্টিভেলৰ মুখ্য আয়োজক শ্যামকানু মহন্তৰ বিৰুদ্ধে ক্ষোভত ফাটি পৰিছে জুবিন গাৰ্গ অনুৰাগী সমাজ।
জুবিন গাৰ্গক চিংগাপুৰলৈ মাতি নি সুৰক্ষা প্ৰদান কৰিব নোৱাৰাৰ অভিযোগ উত্থাপন কৰিছে জুবিন অনুৰাগীসকলে।
ইতিমধ্যে সামাজিক মাধ্যমত যুৱ-প্ৰজন্মকে ধৰি কেইবাগৰাকী বিশিষ্ট ব্যক্তিয়েও জুবিনৰ মৃত্যুৰ বাবে শ্যামকানু মহন্ত তথা নৰ্থ-ইষ্ট ফেষ্টিভেলৰ আয়োজক মণ্ডলীক দোষাৰোপ কৰি ক্ষোভ উজাৰিছে।
সাহিত্যিক জুৰি বৰা বৰগোহাঞিয়ে ফেচবুকত লিখিছে, এই যাতনাৰ মাজতে হঠাতে মনলৈ আহিছে … North East Festival ছিংগাপুৰত কিয় কোনে পাতিছিল? দ্বিতীতে বিগত তিনিবছৰমান সঘনাই অসুস্থ মানুহজনক বিপদজনক স্কুবা ডাইভিং কৰিবলৈ কোনে কেনেকৈ দিলে? য’ত গৰিমা শইকীয়াও নাছিল! তৃতীয়তে কিয় এনেকৈ বহুতৰ বাবে অচিন দেশ এখনত আমি আমাৰ সময়ৰ এজন প্ৰসিদ্ধ গায়কক হেৰুৱাব লগা হ ল? আমি অসমীয়াই তেওঁৰ পৰা আৰু বহুত পাবলৈ থাকি গ’ল। আমাক কোনে উত্তৰ দিব? আন এটা পোষ্টত তেওঁ লিখিছে, ৰাজ্য এখনৰ বিখ্যাত শিল্পী- সাহিত্যিকৰ জীৱনৰ সুৰক্ষা দায়িত্ব চৰকাৰৰ। তাতে North East festival পাতে চৰকাৰৰ অনুদান লৈ। অসমীয়াৰ প্ৰাণৰ শিল্পী জুবিনক আনি শ্ৰদ্ধা জনোৱাৰ আগতে মুখ্যমন্ত্ৰীয়ে স্বীকাৰ কৰক এই আকস্মিক মৃত্যুৰ বাবে চৰকাৰী গাফিলতি আছিল!
কবি প্ৰাৱন্ধিক ডঃ কমল কুমাৰ তাঁতীয়ে লখিছে, গোটেই ঘটনাটোৰ সমুচিত তদন্ত হ’ব লাগে৷ অসমৰ মানুহে জানিব লাগিব কি পৰিস্থিতিত কিদৰে আমি জুবিন গাৰ্গক হেৰুৱালোঁ৷ নিজৰ ব্যৱসায় চলোৱাৰ কাৰণে মানুহজনক আমাৰ পৰা আঁতৰাই নিয়া মানুহবোৰে সকলো কথাৰ উত্তৰ দিব লাগিব৷ ফেষ্টিভেল মহন্তটোক অসমলৈ আহিবলৈ নিদিব, ৰাইজ !!!
কবি প্ৰণৱ কুমাৰ বৰ্মনে লিখিছে, ই এক আওপকীয়া হত্যাকাণ্ড!!!! কোন কোন জড়িত তদন্ত হ’ব লাগিব। এজন চিজাৰ ৰোগীক কিয় লৈ যোৱা হৈছিল এডভেন্সাৰ কৰাবলৈ? কিয় তেওঁৰ স্বাস্থ্যৰ যতন লোৱা হোৱা নাছিল? লগত বাউন্সাৰ আছিল- চিকিৎসক আছিল নে? উদ্যোক্তা সকলৰ বাবে তেওঁ খেলৰ পুতলা আছিল নেকি? আজি নিশা বা কাইলৈ ৰাইজৰ কাঠগড়াত শিল্পীক নিৰাপত্তা দিব নোৱৰা সকলো থিয় হ’ব লাগিব!!
ছবি প্ৰযোজক লুইত কুমাৰ বৰ্মনে ফেচবুকত লিখিছে, মৃত্যুৰ পিছত অভাৱ অনুভৱ কৰিছোঁ। কিমান কাজিয়া আছিল কিন্তু মৃত্যু কামনা কৰা নাছিলো। আৰু ৩০ বছৰ মান যুজি থাকিব বিচাৰিছিলোঁ। চব কুটৰ ঘাই ফেষ্টিভেল মহন্ত। চৰকাৰী টকা লুটি পুটি বাৰে বাৰে উৎসৱ পাতে। জুবিনক ব্যৱহাৰ কৰি। কিহৰ দৰকাৰ আছিল Singaporeত এইবোৰ পাতিবলৈ না চিংগাপুৰত গ’ল হৈ না ঘটনা ঘটিল হেতেন। তদন্ত হব লাগে।
ইপিনে, দ্য ক্ৰছ কাৰেন্টৰ মুখ্য সম্পাদক জিতুমণি বৰাৰ সৈতে শ্যামকানু মহন্তৰ এটা কল ৰেকৰ্ডিং ভাইৰেল হোৱাৰ পিছত ক্ষোভত জ্বলি উঠিছে অসমৰ ৰাইজ। উক্ত টেলিফোনিক বাৰ্তালাপত শ্যামকানু মহন্তই এইদৰে কৈছিল যে জুবিনৰ প্ৰকৃততে কি হৈছিল, মই নাজানো। সেই সময়ত মই উদ্যোক্তাসকলৰ লগত আলোচনাত ব্যস্ত আছিলো। জুবিনে তেতিয়া কেইজনমান বন্ধুৰ সৈতে ফুৰিবলৈ গৈছিল। এই দায়সৰা বক্তব্যই যেন অধিক বিপদ কঢ়িয়াই আনিছে শ্যামকানু মহন্তলৈ। সচেতন মহলে শংকা প্ৰকাশ কৰিছে যে ক্ষোভিত যুৱ প্ৰজন্মই যিকোনো মুহূৰ্তত শ্যামকানু মহন্তৰ বাসগৃহত বা শ্যামকানু মহন্তৰ ওপৰত আক্ৰমণ কৰিব পাৰে। সেয়েহে, সচেতন ৰাইজে শ্যামকানু মহন্তৰ বাসগৃহ আৰু শ্যামকানু মহন্তৰ বাবে কঠোৰ নিৰাপত্তাৰ ব্যৱস্থা কৰিবলৈ চৰকাৰক আহ্বান জনাইছে।
