মাৰ্ঘেৰিটাত অংগনৱাড়ী কেন্দ্ৰত অবৈধ নিযুক্তিৰ প্ৰতিবাদত জিলা উপায়ুক্তক স্মাৰকপত্ৰ প্ৰদান ৰাইজৰ

তিনিচুকীয়া জিলাৰ মাৰ্ঘেৰিটা শিক্ষাখণ্ডৰ অন্তৰ্গত ইনথেম গাওঁ পঞ্চায়তৰ অধীনৰ নগাপথাৰৰ দুই নং ৱাৰ্ডৰ নগাপথাৰ অংগনৱাড়ী কেন্দ্ৰটোত দীৰ্ঘদিনৰ পৰা খালি হৈ থকা কৰ্মী পদটোত নিযুক্তিক লৈ ব্যাপক খেলি-মেলিৰ অভিযোগ কৰিছে স্থানীয় ৰাইজে।

স্থানীয় ৰাইজৰ অভিযোগ মতে, অংগনৱাড়ী কেন্দ্ৰটোত যোৱা ৭/৮ মাহ ধৰি কৰ্মীগৰাকী অসুস্থ বৈ থকাত সহায়িকাগৰাকীয়েই শিশুসকলক পাঠদান কৰি আহিছে। সহায়িকাগৰাকীক এই ক্ষেত্ৰত সহযোগ কৰি আহিছে স্থানীয় ২/৩ গৰাকী শিক্ষিত মহিলাই।

স্থানীয় মহিলাকেইগৰাকীয়ে বিগত কেইবা মাহ ধৰি কেন্দ্ৰটোৰ পৰিচালনা সমিতিৰ নিৰ্দ্দেশ মতে কণ কণ শিশুসকলক পাঠদান কৰি অহাৰ লগতে বিভিন্ন সেৱা আগবঢ়াই আহিছে। অন্যহাতে ২০০২ চনৰ ৩ ফেব্ৰুৱাৰি মাহতেই কৰ্মত যোগদান কৰা পূৰ্বৰ কৰ্মী নগাপথাৰ নিবাসী আশংকা উম্বন ফুকনে শিক্ষাদানৰ ক্ষেত্ৰত অপাৰগতা প্ৰকাশ কৰি বিভাগীয় কৰ্তৃপক্ষলৈ ত্যাগপত্ৰ প্ৰেৰণ কৰাত বিভাগীয় কাৰ্যালয়েও কৰ্মী গৰাকীৰ ত্যাগপত্ৰ গ্ৰহণ কৰাৰ পৰিপ্ৰেক্ষিতত বিগত কেইবামাহ ধৰি উক্ত পদটো খালি হৈ আছে।

সেইমৰ্মে স্থানীয় কেইগৰাকীমান শিক্ষিত মহিলাই অংগনৱাড়ী কেন্দ্ৰটোত খালি হৈ থকা পদটোৰ বাবে সংহত শিশু বিকাশ কেন্দ্ৰ বিষয়াগৰাকীক আবেদন জনোৱাৰ পাছত বিষয়াগৰাকীয়ে যথা সময়ত বাছনি পৰীক্ষা অনুষ্ঠিত কৰা হব বুলি কৈ তেওঁলোকক ওভোতাই পঠিয়ায়।

এনেদৰে বহু মাহ অতিক্ৰম কৰাৰ পাছত হঠাৎ কেইদিন মান আগতে এলেকাটোৰ বাহিৰৰ সংগীতা ৰায় নামৰ এগৰাকী মহিলাই  নিযুক্তি পত্ৰ লৈ অংগনবাদী কেন্দ্ৰটোত যোগদান কৰিবলৈ অহাত স্থানীয় একাংশ মহিলাই বাধা প্ৰদান কৰি ঘুৰাই পঠায় বুলি বিদ্যালয় পৰিচালনা সমিতিৰ সভানেত্ৰী দিপ্তী মহনে জানিবলৈ দিয়ে।

কাকপথাৰ আৰু মাৰ্ঘেৰিটা কেন্দ্ৰৰ দায়িত্বত থকা লীনা সোণোৱাল নামৰ চি.ডি.পি.অ. গৰাকীয়ে অবৈধ বুজা বুজিৰে নিযুক্তিপত্ৰ প্ৰদান কৰা বুলি অভিযোগ তুলিছে স্থানীয় একাংশ মহিলাৰ লগতে বিদ্যালয় পৰিচালনা সমিতিয়ে।

এই বিষয়ত হস্তক্ষেপ কৰি উচিৎ পদক্ষেপ গ্ৰহণ কৰাৰ বাবে ৩০ গৰাকীৰো অধিক মহিলাৰ স্বাক্ষৰ সম্বলিত স্মাৰকপত্ৰ মাৰ্ঘেৰিটা বিধান সমষ্টিৰ বিধায়ক ভাস্কৰ শৰ্মা, তিনিচুকীয়া জিলা উপায়ুক্ত, মাৰ্ঘেৰিটা মহকুমাধিপতি, সংহত শিশু বিকাশ কেন্দ্ৰ, জিলা সমাজ কল্যাণ বিষয়া, পেঙেৰী আৰক্ষী থানা, মাৰ্ঘেৰিটা আঞ্চলিক ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদ আদিলৈ পৃথকে পৃথকে পৃথকে প্ৰেৰণ কৰা হৈছে।

স্মাৰকপত্ৰখনত অঞ্চলটোৰ বাহিৰৰ এগৰাকী মহিলাক নীতি বহিঃভূত কেনেকৈ নিযুক্তি দিলে বুলি প্ৰশ্ন উত্থাপন কৰাৰ লগতে এগৰাকী আৰ্থিকভাৱে স্বচ্ছল মহিলাক গোপন বুজাবুজিৰে নিযুক্তি দিয়া বুলি অভিযোগ কৰিছে স্থানীয় মহিলা সকলে। এই ক্ষেত্ৰত বিহিত ব্যৱস্থা গ্ৰহণ কৰিবলৈ শিক্ষা বিভাগক আহ্বান জনাইছে। অন্যথা ইনথেম অঞ্চলৰ স্থানীয় মহিলাসকলে আন্দোলনৰ কাৰ্য্যসূচী হাতত ল’বলৈ বাধ্য হ’ব বুলি স্পষ্ট কৰি দিছে।