আজি তিনিচুকীয়া জিলাৰ লিডুৰ অন্তর্গত টিৰাপ কলিয়ৰীত আৰক্ষীয়ে অভিযান চলাই ৫০ হাজাৰৰো অধিক টকা মূল্যৰ ব্ৰাউন চুগাৰ সহ এজন বিক্ৰেতাক আটক কৰিছে৷ অবশ্যে বিক্ৰেতাজনৰ লগৰজন আৰক্ষীৰ চকুত ধূলি দি পলাই যাবলৈ সক্ষম হয়। ধৃত লোকজনক বিকাশ চাকমা বুলি চিনাক্ত কৰা হৈছে। ধৃত চাকমাৰ ঘৰ অৰুণাচলৰ চাংলাং জিলাৰ বৰডুমচাত৷
সমগ্ৰ অসমত শেহতীয়াভাৱে গাঞ্জা, নিচাযুক্ত দ্ৰব্য আদি ব্যাপক হাৰত উপলব্ধ হোৱাটো পৰিলক্ষিত হৈছে। বিশেষকৈ নিচাপ্ৰিয় যুৱচামৰ মাজত ব্যাপক জনপ্ৰিয়তা লাভ কৰা নিচাযুক্ত দ্ৰব্য যেনে হেৰ’ইন, ব্ৰাউন ছুগাৰ আদিৰ এখন বে-আইনী বজাৰ অসমত শক্তিশালী ৰূপত গঢ়ি উঠিছে। মাৰ্ঘেৰিটা চহৰ আৰু ইয়াৰ উপকণ্ঠীয় এলেকা আৰু গাঁও-ভূঁইত সহজলভ্য হৈ পৰিছে নিচাযুক্ত ঔষধ।
উল্লেখ্য যে উত্তৰ-পূৰ্বাঞ্চলৰ কিছুমান এলেকাৰ আৰু চুবুৰীয়া ৰাষ্ট্ৰ কেইখনমানৰ জলবায়ু আৰু ভূ-তাত্বিক গঠনৰ বাবে সেই সেই এলেকাৰ বাসিন্দাসকলে জীৱিকাৰ তাড়নাত নিচাযুক্ত ঔষধ প্ৰস্তুত কৰিব পৰা আফিঙৰ খেতি কৰি আহিছে। সেই অৱস্থাৰ সুযোগ গ্ৰহণ কৰিয়েই এই আফিঙৰ পৰা এচাম অসাধু লাভখোৰ ব্যৱসায়ীয়ে গৱেষণাগাৰত প্ৰস্তুত কৰি আহিছে মাৰাত্মক নিচাযুক্ত ঔষধ ব্ৰাউন ছুগাৰ, হেৰ’ইন ইত্যাদি। এচাম অতি ক্ষমতাশালী লোক এই ব্যৱসায়টোৰ সৈতে জড়িত হৈ থকাৰ বাবে নিচাযুক্ত ঔষধৰ ব্যৱসায়ৰ সাম্ৰাজ্যখন এক অনিয়ন্ত্ৰিত হাৰত বৃদ্ধি হৈ আছে।
সদ্যহতে ব্ৰাউন ছুগাৰৰ সৈতে ধৰা পৰা বিকাশ চাকমাক লিডু আৰক্ষীয়ে জেৰা কৰি আছে।
