মাৰ্ঘেৰিটা মহকুমাৰ ১২টা জ্বলন্ত সমস্যা সমাধানৰ দাবী টাই আহোম যুৱ পৰিষদৰ
তিনিচুকীয়া জিলাৰ মাৰ্ঘেৰিটা মহকুমাৰ ১২ টাকৈ ৰাজহুৱা স্বাৰ্থজড়িত হৈ থকা জ্বলন্ত সমস্যা ক’ল ইণ্ডিয়াৰ যোগেদি সমাধান কৰাৰ দাবীত বিগত বৰ্ষত টাই আহোম যুৱ পৰিষদৰ মাৰ্ঘেৰিটা মহকুমা সমিতিয়ে মাৰ্ঘেৰিটা মহকুমাধিপতিৰ যোগেদি জিলা উপায়ুক্তলৈ এখনি স্মাৰক পত্ৰ প্ৰেৰণ কৰিছিল৷
কিন্তু লক্ষ্যণীয়ভাৱে আজি পৰ্যন্ত এই দাবী সমূহ পূৰণ কৰাত কোনো ধৰণৰ গুৰুত্ব আৰোপ নকৰাত এতিয়া স্বাভাৱিকতে টাই আহোম যুৱ পৰিষদৰ মাৰ্ঘেৰিটা মহকুমা সমিতিৰ নেতা-কৰ্মীসকল ক্ষুন্ন হৈ পৰা পৰিলক্ষিত হৈছে।
উল্লেখ্য যে মাৰ্ঘেৰিটা মহকুমাৰ অন্তৰ্গত উত্তৰ-পূৱ কয়লাক্ষেত্ৰই বৃটিছ আমোলৰ দিনৰ পৰা কয়লাৰাণী ‘পাটকাই পৰ্ব্বত’ক খান্দি ধ্বংস কৰি অহাৰ বাবে সংগঠনটোৰ নেতৃবৃন্দই এই সমস্যা সন্দৰ্ভত সমাধানৰ দাবী তুলি স্মাৰক পত্ৰ প্ৰদান কৰিছিল।
প্ৰতি বছৰে গছপুলি ৰোপণ কৰা, কয়লাক্ষেত্ৰৰ অন্তৰ্গত সংগঠিত হোৱা ভূমিস্খলন বা প্ৰাকৃতিক দুৰ্য্যোগত দুৰ্গতক ক্ষতিপূৰণ দিয়া, দিহিং পাটকাই সমন্বয় ক্ষেত্ৰত থকা সম্পদ সমূহ সংৰক্ষণ কৰাৰ লগতে সমন্বয় ক্ষেত্ৰত এটা প্ৰেক্ষাগৃহ নিৰ্মাণ কৰা, জাগুন অঞ্চলত এটি অতিথিশালা নিৰ্মাণ কৰা, কয়লাক্ষেত্ৰ খনৰ আশে-পাশে থকা ভাটা সমূহৰ লগতে প্ৰদূষণ নিয়ন্ত্ৰণৰ ব্যৱস্থা কৰাকে আদি কৰি বাৰদফীয়া দাবীৰে স্মাৰক পত্ৰখন তিনিচুকীয়া জিলা প্ৰশাসনক প্ৰদান কৰিছিল।
ইয়াৰ উপৰি সামাজিক দায়বদ্ধতাৰ আঁচনিৰ জৰিয়তে মাৰ্ঘেৰিটা মহকুমাৰ গাঁও সমূহত চিকিৎসা শিৱিৰৰ ব্যৱস্থা কৰাৰ লগতে মহকুমাটোৰ দুখীয়া ছাত্ৰ-ছাত্ৰীৰ বাবে প্ৰশিক্ষণৰ সুবিধাৰ্থে অতি কমেও ৫০টা কম্পিউটাৰ যোগান ধৰিবলৈও উক্ত স্মাৰক পত্ৰৰ জৰিয়তে দাবী জনাইছিল৷
তৎকালীন ভাৱে উত্তৰ-পূৱ কয়লাক্ষেত্ৰই উপৰোক্ত দাবী সমূহ পূৰণ নকৰিলে বৃহত্তৰ গণস্বাৰ্থক নেওচা দিয়া ক’ল ইণ্ডিয়াৰ বিৰুদ্ধে গণতান্ত্ৰিক ভাবে আন্দোলন গঢ়ি তোলা হ’ব বুলি এক প্ৰেছ বাৰ্তাৰ জৰিয়তে সংগঠনটোৰ সাধাৰণ সম্পাদক জানা সন্দিকৈয়ে হুংকাৰ প্ৰদান কৰে।