মেকলেউড ৰাছেল ইণ্ডিয়াৰ দ্বাৰা সংগোপনে বিক্ৰী ১২ খনকৈ চাহ বাগিচা : ২৪জুনৰ ভিতৰত চুক্তি ৰাজহুৱা কৰাৰ দাবী আটছাৰ

বৃহৎ পুঁ‌জিপতি চাহ কোম্পানী ‘মেকলেউড ৰাছেল ইণ্ডিয়া লিমিটেডে’ (McLeod Russel India Ltd) তিনিচুকীয়া আৰু ডিব্ৰুগড় জিলাৰ ১২ খনকৈ চাহ বাগিচা  এম কে শ্বাহ নামৰ এটা দেউলীয়া চাহ কোম্পানীৰ ওচৰত বিক্ৰি কৰিছে। উক্ত চাহ বাগিচাকেইখন সংগোপনে  বিক্ৰী কৰা কাৰ্য্যত সৰৱ হৈ উঠিছে অসম চাহ জনজাতি ছাত্ৰ সন্থা চমুকৈ আটছা ।

এক বিবৃতিত আটছাৰ তিনিচুকীয়া জিলা সমিতিৰ সভাপতি পৰেশ গোৱালাই উল্লেখ কৰিছে যে মেকলেউড  ৰাছেল ইণ্ডিয়া লিমিটেডে যদিও উক্ত বাগিচাসমূহ বিক্ৰী কৰিছে তেন্ত শ্ৰমিক-কৰ্মচাৰী সকলে পাব লগা বকেয়া তথা অন্যান্য সা-সুবিধাসমূহৰ ক্ষেত্ৰত কি চুক্তি কৰিছে সেই চুক্তি অতি শীঘ্ৰে ৰাজহুৱা কৰাৰ দাবী জনাইছে।

এই ক্ষেত্ৰত ২৪ জুনৰ সময়সীমা বান্ধি দি আটছা নেতাগৰাকীয়ে কয় যে এই সময়সীমাৰ ভিতৰত চুক্তিৰ তথ্য ৰাজহুৱা নকৰিলে তীব্ৰ প্ৰতিবাদী কাৰ্যসূচী হাতত লোৱা হ’ব। আটছাৰ নেতাগৰাকীয়ে আৰু কয় যে এম কে শ্বাহ নামৰ যিটো চাহ কোম্পানীয়ে এই বাগিচা সমূহ ক্ৰয় কৰা বুলি খবৰ ওলাইছে সেই কোম্পানীটোৰ অধীনত থকা চাহ বাগিছাসমূহ সম্প্ৰতি একেবাৰে দেউলীয়া অৱস্থাত আছে। এনে ক্ষেত্ৰত পুনৰ ১২ খনকৈ চাহ বাগিচা ক্ৰয় কৰি কোম্পানীটোৱে কেনেদৰে পৰিচালনা কৰিব, সেয়া চিন্তনীয় বিষয়।

প্ৰত্যক্ষ আৰু পৰোক্ষভাৱে ৩৬ লাখ শ্ৰমিক কৰ্মচাৰীক জীৱিকাৰ সন্ধান দিয়া মেকলেউড ৰাছেল ইণ্ডিয়া লিমিটেডৰ দৰে কোম্পানীয়ে কিয় অসম এৰি যাব বিচাৰিছে সেয়া অতি চিন্তনীয় বিষয় বুলি মন্তব্য কৰি আটছা নেতা পৰেশ গোৱালাই বিষয়টো গুৰুত্বসহকাৰে গ্ৰহণ কৰিবলৈ চৰকাৰক দাবী জনাইছে ।