মেট্ৰিক আৰু উচ্চতৰ মাধ্যমিকৰ কৃতী ছাত্ৰ-ছাত্ৰীক বৰপেটা জিলা প্ৰশাসনৰ সম্বৰ্ধনা
সদ্য ঘোষিত হাইস্কুল শিক্ষান্ত আৰু উচ্চতৰ মাধ্যমিকৰ চূড়ান্ত পৰীক্ষাত ৰাজ্যৰ ভিতৰত স্থান লাভ কৰি বৰপেটা জিলালৈ সুনাম কঢ়িয়াই অনা মুঠ ১১ গৰাকী কৃতী ছাত্ৰ-ছাত্ৰীক আজি বৰপেটা জিলা প্ৰশাসনৰ তৰফৰ পৰা সম্বৰ্ধনা জ্ঞাপন কৰা হয়।
জিলা প্ৰশাসনৰ উদ্যোগত আৰু বৰপেটা জিলা অধিবিদ্যা পৰিষদৰ সহযোগত জিলা উপায়ুক্ত কাৰ্যালয়ৰ সভাকক্ষত বিয়লি প্ৰায় ৪ বজাৰ পৰা অনুষ্ঠিত সম্বৰ্ধনা অনুষ্ঠানত মুখ্য অতিথি হিচাপে অংশ গ্ৰহণ কৰে মাধৱ চৌধুৰী মহাবিদ্যালয়ৰ অৱসৰপ্ৰাপ্ত অধ্যক্ষ অৰ্জুন চন্দ্ৰ দাসে।
জিলা উপায়ুক্ত থানেশ্বৰ মালাকাৰৰ সভাপতিত্বত অনুষ্ঠিত সম্বৰ্ধনা অনুষ্ঠানত কৃতী ছাত্ৰ-ছাত্ৰীসকলক উদ্দেশ্যি দিয়া চমু ভাষণত অৰ্জুন চন্দ্ৰ দাসে কয় যে, হাইস্কুল শিক্ষান্ত পৰীক্ষাৰ ফলাফলতকৈ উচ্চতৰ মাধ্যমিকৰ চূড়ান্ত বৰ্ষৰ পৰীক্ষাৰ ফলাফলৰ গুৰুত্ব বহু বেছি। কিয়নো এই পৰীক্ষাৰ ফলাফলে ছাত্ৰ-ছাত্ৰীৰ দিক-নিৰ্ণয় কৰে।
অনুষ্ঠানত জিলা উন্নয়ন আয়ুক্ত ডাঃ বাবুল চহৰীয়া, আৰক্ষী অধীক্ষক ভায়োলেট বৰুৱা, বিদ্যালয়সমূহৰ পৰিদৰ্শক জ্যোৎস্নাৰাণী বৰ্মনৰ লগতে কেইবাগৰাকী বিষয়ববীয়া আৰু শিক্ষানুষ্ঠানৰ মুৰববীসকল উপস্থিত থাকে।
এই সম্বৰ্ধনা সভাত হাইস্কুল শিক্ষান্ত পৰীক্ষাত স্থান লাভ কৰা আনন্দৰাম বৰুৱা একামেডীৰ ছাত্ৰ অবিনাশ কলিতা, ছেইণ্ট টেৰেছা ইংৰাজী বিদ্যালয়ৰ চুলতানা আঈশ্বাহ ছিদ্দিকা, শ্যামলিনা পাঠক, আনন্দৰাম বৰুৱা একাডেমীৰ নিবিড় ডেকাক জিলা প্ৰশাসনৰ তৰফৰ পৰা আনুষ্ঠানিকভাৱে সম্বৰ্ধনা জনায়।
একেদৰে উচ্চতৰ মাধ্যমিকৰ চূড়ান্ত বৰ্ষৰ বিজ্ঞান শাখাত স্থান লাভ কৰা কৃষ্ণকান্ত সন্দিকৈ কনিষ্ঠ মহাবিদ্যালয়ৰ ছাত্ৰ ক্ৰমে নীহাৰিকা গোস্বামী, ভাস্কৰজ্যোতি কলিতা, ভাস্বতী কলিতা আৰু আনন্দৰাম বৰুৱা একাডেমীৰ ফাৰদিন ৰফিক, কৃষ্ণকান্ত সন্দিকৈ কনিষ্ঠ মহাবিদ্যালয়ৰ ভনিতা ৰয়, ঋতুপৰ্ণ কলিতা আৰু হিয়াশ্ৰী চৌধুৰীক সম্বৰ্ধনা জনোৱা হয়। কৃতী ছাত্ৰ-ছাত্ৰীসকলক একোখনকৈ অভিনন্দন পত্ৰ, ফুলাম গামোচা, কিতাপৰ টোপোলা প্ৰদান কৰা হয়।
আনহাতে এই সম্বৰ্ধনা অনুষ্ঠানত আনন্দৰাম বৰুৱা কনিষ্ঠ মহাবিদ্যালয়ৰ অধ্যক্ষ ৰঞ্জিত ডেকা আৰু ছেইণ্ট টেৰেছা ইংৰাজী বিদ্যালয়ৰ প্ৰধান শিক্ষক বিপিন পি এছ উপস্থিত থাকে।
সম্বৰ্ধনা অনুষ্ঠানৰ পিছত হাইস্কুল শিক্ষান্ত পৰীক্ষাত ৰাজ্যৰ ভিতৰত দ্বিতীয় স্থান লাভ কৰা অবিনাশ কলিতাৰ পিতৃ তথা অপ্ৰাদেশীকৃত শিক্ষানুষ্ঠান বিদ্যাভৱন নিত্যানন্দ উচ্চতৰ মাধ্যমিক বিদ্যালয়ৰ বিষয় শিক্ষক নিৰ্মল কলিতাই পুত্ৰৰ সাফল্যত যথেষ্ট উৎসাহী যদিও ভেন্সাৰ শিক্ষানুষ্ঠানত কৰ্মৰত হোৱা হেতুকে পুত্ৰক উপযুক্ত শিক্ষাৰে গঢ় দিব পাৰিব নে নাই তাক লৈ সংবাদ মাধ্যমৰ আগত আশংকা ব্যক্ত কৰে।
কৃতী ছাত্ৰগৰাকীৰ পিতৃয়ে দৰমহাৰ মুখ নেদেখাকৈ বহু বছৰ ধৰি শিক্ষকতা কৰি অহাৰ ফলত পৰিয়ালটোলৈ বহু সমস্যা নামি পৰা বুলি উল্লেখ কৰি এনে শিক্ষানুষ্ঠানত কৰ্মৰত শিক্ষক-কৰ্মচাৰীসকলক আৰ্থিক দিশত সকাহ দিয়াৰ বাবে চৰকাৰক আহ্বান জনায় অবিনাশ কলিতাৰ পিতৃ নিৰ্মল কলিতাই।