মেৰাপানীত উদ্ধাৰ সদ্যোজাত শিশুৰ মৃতদেহ

গোলাঘাট জিলাৰ মেৰাপানী আৰক্ষী থানাৰ অন্তৰ্গত চাউদাং পথাৰ ঘিলাধাৰীচুকত দেওবাৰে এটি সদ্যোজাতৰ মৃতদেহ উদ্ধাৰক কেন্দ্ৰ কৰি অঞ্চলটোত তীব্ৰ চাঞ্চল্যৰ সৃষ্টি হৈছে। প্ৰাপ্ত তথ্য মতে ঘিলাধাৰী চুকৰ এটা পৰিয়ালৰ বাৰীত স্থানীয় ৰাইজে  এটি সদ্যোজাতৰ ক্ষত-বিক্ষত মৃতদেহ দেখা পায়। পাছত গাঁৱৰ ৰাইজে অনুসন্ধান কৰি জানিব পাৰিলে যে দুদিন পূৰ্বে অঞ্চলটোৰ কুঞ্জ গগৈ নামৰ এগৰাকী মহিলাই উক্ত সন্তানটি হত্যা কৰি গাঁত খান্দি পুতি থৈছিল। আনহাতে ঘটনাটো পোহৰলৈ অহাত ৰাইজে এনে জঘন্য কাণ্ড সংঘটিত কৰা মহিলা গৰাকীক ধৰি আৰক্ষীৰ হাতত গটাই দিয়ে। উল্লেখযোগ্য যে বিগত এটা বছৰে মহিলাগৰাকীৰ স্বামী কৰ্মসূত্ৰে চেন্নাইত থাকে। মহিলা গৰাকীৰ স্বীকাৰোক্তি অনুসৰি স্বামীৰ অৱৰ্তমানত সম্পৰ্কীয় দেওৰেক দীপু গগৈৰ সৈতে ৰক্ষা কৰি অহা অবৈধ সম্পৰ্কৰ কলংক মচিবলৈকে এই নৃশংস কাণ্ড সংঘটিত কৰে। পৰৱৰ্তী সময়ত মেৰাপানী আৰক্ষী উপস্থিত হৈ মৃত সন্তানটি উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰাৰ লগতে অভিযুক্ত মহিলাগৰাকীক আটক কৰে।