মোডীয়ে নিৰ্বাচনী আচৰণ বিধি ভংগ কৰিছে : তৰুণ গগৈ
প্ৰাক্তন মুখ্য মন্ত্ৰী তথা জ্যেষ্ঠ কংগ্ৰেছ নেতা তৰুণ গগৈয়ে অভিযোগ কৰে যে প্ৰধান মন্ত্ৰী নৰেন্দ্ৰ মোডীয়ে ভোটগ্ৰহণৰ দিনটোত অসমলৈ প্ৰচাৰ চলাবলৈ আহি নিৰ্বাচনী আচৰণ বিধি ভংগ কৰিছে।
গগৈয়ে স্পষ্ট কৰি দিয়ে যে প্ৰধান মন্ত্ৰীয়ে বৃহস্পতিবাৰে প্ৰচাৰৰ বাবে অসমলৈ আহি মঙলদৈ আৰু শিলচৰত অনুৰাগীৰ উপস্থিতিত নিৰ্বাচনী সমাৱেশত ভাষণ দি নিৰ্বাচনী আচৰণ বিধি ভংগ কৰিছে।
বৃহস্পতিবাৰে লোকসভা নিৰ্বাচন ২০১৯ৰ প্ৰথম পৰ্যায়ত অসমৰ পাঁচটা সমষ্টি ক্ৰমে কলিয়াবৰ, লখিমপুৰ, তেজপুৰ, যোৰহাট আৰু ডিব্ৰুগড়ত ভোটগ্ৰহণ অনুষ্ঠিত হৈছে।
‘’মোডীয়ে নিৰ্বাচনৰ কোনো ভোটগ্ৰহণ নোহোৱালৈ চাই কাইলৈ প্ৰচাৰ চলাব পাৰিলেহেঁতেন,’’-গগৈয়ে কয়।
প্ৰাক্তন মুখ্য মন্ত্ৰীগৰাকীয়ে লগতে মোডীয়ে অসম আন্দোলনৰ শ্বহীদৰ নামত ভোট অৰ্জনৰ প্ৰচেষ্টা চলাই পৰোক্ষভাৱে নিৰ্বাচন আচৰণ বিধি ভংগৰ অভিযোগ কৰে।
‘’অসম আন্দোলনৰ শ্বহীদৰ নামত ভোট বিচৰাটোও পৰোক্ষভাৱে এক নিৰ্বাচনী আচৰণ বিধিৰ উলংঘন। শ্বহীদসকল আমাৰ আৰু বিজেপিৰ নহয়,’’-গগৈয়ে লগতে কয়।