হোজাই নগৰৰ নতুন বজাৰত স্থানীয় বিধায়ক শিলাদিত্য দেব আৰু হোজাইৰ জিলা উপায়ুক্ত মানবেন্দ্ৰ প্ৰতাপ সিঙে আজি এটা যোগকেন্দ্ৰ উদ্ধোধন কৰে।
কেন্দ্ৰটো উদ্ধোধন কৰি শিলাদিত্য দেবে কয়, ‘আমাৰ পৰা যোগাসন শিকাৰ উদ্দেশ্যে আজি ১৮৫ দেশে ভাৰতলৈ চকু দি আছে কিন্তু আমাৰ যুৱপ্ৰজন্ম জিমত ব্যস্ত।’
আনহাতে ভাষণৰ মাজতে তেওঁ ‘যোগচৰ্চাৰ নামত কোনো ৰাজনীতি হ’ব নালাগে’ বুলি মন্তব্য কৰি তেওঁ কয় যে বিনা খৰচতে তথা কোনো সঁজুলি নোহোৱাকৈ ইয়াক শিকিব পাৰি।
আজি এই অনুষ্ঠানটোতে উপস্থিত থকা উপায়ুক্ত মানবেন্দ্ৰ প্ৰতাপ সিঙে অসম চৰকাৰে যোৱা বছৰ ৰাজ্যখনৰ বিভিন্ন ব্ল’কত ১০০ টা যোগকেন্দ্ৰ খোলা হ’ব বুলি ঘোষণা কৰাৰ কথা উল্লেখ কৰি তেওঁ কয়, ‘ইয়াৰে হোজাই জিলাৰ বাবে দুটা কেন্দ্ৰ অনুমোদন জনোৱা হৈছে, এটা হোজাইৰ ঢলপুখুৰী ব্ল’কত আৰু আনটো লংকাৰ উদালি ব্ল’কত।’
ইমান দিনে হোজাইৰ ৰাম কৃষ্ণ মিছনত চলাই অহা কেন্দ্ৰটোক এক স্থায়ী স্থানত মুকলি কৰি তেওঁ কয়, ‘যোগ আমাৰ এক বহুমূলীয়া ঐতিহ্যপুৰ্ণ শিক্ষা, ইয়াক প্ৰসাৰ কৰাটো আমাৰ দায়িত্ব।’
তদুপৰি তেওঁ দৈনিক ৩০ মিনিটকৈ যোগাসন কৰিলে আমাৰ মস্তিস্কই কম্পুটাৰৰ দৰে হৈ উঠিব বুলিও মন্তব্য কৰে।
আজিৰ এই উদ্ধোধনী অনুষ্ঠানত স্থানীয় বহুকেইজন গণ্য মান্য ব্যক্তি উপস্থিত আছিল।
