শাৰীৰিক প্ৰতিবন্ধকতা নেওচি উঃ মাঃ চূড়ান্ত পৰীক্ষাত উজ্বলিল ৰাইদঙীয়াৰ প্ৰদীপ
মনত প্ৰৱল ইচ্ছাশক্তি থাকিলে যে শাৰীৰিক প্ৰতিবন্ধকতায়ো হাৰ মনাব নোৱাৰে তাকেই প্ৰমাণ কৰিলে ৰাইদঙীয়া মধুপুৰ গাঁৱৰ প্ৰদীপ বৰাই।
ছাত্ৰজনে বৃহস্পতিবাৰে ঘোষিত উচ্চতৰ মাধ্যমিকৰ চূড়ান্ত পৰীক্ষাৰ কলা বিভাগৰ ফলাফলত অসমীয়া বিভাগত লেটাৰ মাৰ্কসহ প্ৰথম বিভাগত উত্তীৰ্ণ হৈছে।
উল্লেখযোগ্য যে ৰাইদঙীয়াৰ নৰেন বৰা আৰু ৰূপা বৰাৰ পুত্ৰ প্ৰদীপ দহ বছৰৰ পূৰ্বে এক জটিল ৰোগত আক্ৰান্ত হৈ শাৰীৰিকভাবে অক্ষম হৈ পৰিছিল। যাৰ ফলত ছাত্ৰজনে বহি লিখা আৰু পঢ়িবলৈ অসুবিধা হোৱাৰ লগতে বিদ্যালয়লৈ যাবলৈও বহু কষ্ট হৈছিল।
দিন হাজিৰা কৰা পিতৃ মাতৃয়ে উন্নতমানৰ চিকিৎসা কৰাব নোৱৰাৰ ফলত সম্পূর্ণ ৰূপে খোজ কাঢ়িব নোৱাৰা হৈ পৰে প্ৰদীপ। যাৰ বাবে মাক আৰু মাহীয়েকে চাইকেলত উঠাই প্ৰদীপক বিদ্যালয়লৈ লৈ যাব লগীয়া হৈছিল।
মন কৰিবলগীয়া যে বটদ্ৰৱা সমষ্টিৰ বিধায়িকা আঙুৰলতা ডেকাক বহুবাৰ দুৰ্ভগীয়া পৰিয়ালটোয়ে প্ৰদীপৰ চিকিৎসাৰ বাবে আবেদন নিবেদন কৰিছিল যদিও বৰ্তমানলৈকে বিধায়িকাগৰাকীয়ে কোনোধৰণৰ পদক্ষেপ গ্ৰহণ কৰা নাই।
বহু কষ্ট আৰু বাধাৰ মাজৰে পঢ়া-শুনা কৰি কৰি আজি এই সাফল্য অৰ্জন কৰিবলৈ সক্ষম হোৱা মেধাৱী প্ৰদীপৰ ভৱিষ্যতে এগৰাকী প্ৰশাসনিক বিষয়া হোৱাৰ মন। কিন্তু তাৰ বাবে প্ৰয়োজন বহু অৰ্থ, যিটো প্ৰদীপৰ পৰিয়ালটোয়ে বহন কৰিব নোৱাৰে। সেয়ে এতিয়া প্ৰদীপৰ উচ্চ শিক্ষাৰ বাবে কোনো সদাশয় ব্যক্তি বা দল সংগঠনৰ সহায়ৰ প্ৰয়োজন।