শিল্পীৰ তুলিকাত উদ্ভাসিত হিমা : দৌৰৰাণীক অপূৰ্ব ৰূপত মূৰ্ত কৰি তুলিলে শিল্পী ভূপেন খঙীয়া ফুকনে
ফিনলেণ্ডত বিশ্ব জয় কৰি দেশক গৌৰৱিত কৰা হিমা দাসে অনুপ্ৰাণিত কৰিলে শিল্পীৰ তুলিকাকো। পৰ্ট্ৰেইট শিল্পী ভূপেন খঙীয়া ফুকনে ৰং-তুলিকাৰ জৰিয়তে অপূৰ্ব ৰূপত ভাস্বৰ কৰি তুলিলে হিমাক। শিল্পীজনে নিজৰ ফেইচবুক পোষ্টত আজি নিজে অংকন কৰা হিমাৰ এখন অপূৰ্ব সুন্দৰ প্ৰতিচ্ছবি দিয়ে। শিল্পীজনৰ তুলিকাত হিমা হৈ উঠিছে নতুনকৈ উদ্ভাসিত সূৰ্য্যৰ দৰে।
ভূপেন খঙীয়া ফুকনে অঁকা হিমাৰ ছবিখনত হিমাৰ মুখমণ্ডলত দেখা গৈছে তাৰুণ্যৰ সৰলতা আৰু দৃঢ়তাৰ অপূৰ্ব সমাহাৰ।জানিব পৰা মতে, গুৱাহাটীস্থিত শিল্পী ভূপেন খঙীয়া ফুকন এজন চিত্ৰশিল্পী হোৱাৰ লগতে টেক্সটাইল ডিজাইনাৰো।
শিল্পগুণ আৰু সৌন্দৰ্যই নিমিষতে সকলোৰে মন চুই যাব পৰা ছবিখন বিভিন্নজনক শ্বেয়াৰ কৰা দেখা গৈছে। ফলত লগে লগে চাৰিওফালে বিয়পি পৰিছে ছবিখন।
উল্লেখযোগ্য যে ফিনলেণ্ডত চলি থকা বিশ্ব জুনিয়ৰ এথলেটিকছ প্ৰতিযোগিতাত ১৩ জুলাইত হোৱা মহিলাৰ ৪০০ মিটাৰ দৌৰত হিমাই ৫১.৪৬ ছেকেণ্ডেৰে স্বৰ্ণ পদক জয় কৰিছিল। এইটো আছিল বিশ্ব এথলেটিকছ প্ৰতিযোগিতাত ট্ৰেক ইভেণ্টত ভাৰতৰ প্ৰথম আৰু এই পৰ্য্যন্ত একমাত্ৰ পদক।
এই বিৰল কৃতিত্বৰ বাবে হিমা দেশৰ ৰাষ্ট্ৰপতিৰ পৰা বলিউড, খেলজগতৰ তাৰকালৈ সকলোৱে প্ৰশংসাৰে উপচাই তোলে।