অসমৰ ৰাজ্যপাল অধ্যাপক জগদীশ মুখীয়ে শুকুৰবাৰে কয় যে শিশুসকল দেশৰ ভৱিষ্যৎ আৰু সমাজৰ এক আটাইতকৈ মহান সম্পত্তি।
গুৱাহাটীৰ চানমাৰিৰ অসম আভিযান্ত্ৰিক মহাবিদ্যালয়ৰ খেলপথাৰত বিদ্যা ভাৰতীৰ সহযোগত শিশু শিক্ষা সমিতিয়ে আয়োজন কৰা শিশু সন্মিলন উদ্বোধন কৰি অধ্যাপক মুখীয়ে এইদৰে কয়।
উদ্বোধনী ভাষণত ৰাজ্যপালগৰাকীয়ে কয় যে শিক্ষাই ৰাষ্ট্ৰ গঠনত এক গুৰুত্বপূৰ্ণ ভূমিকা পালন কৰে আৰু লগতে এখন উন্নত সমাজ সৃষ্টি কৰে যিয়ে প্ৰগতিৰ পথত আগবঢ়াই নিয়াত সমাজখনক সহায় কৰে।
‘’বৰ্তমান সময়ত শিক্ষা অধিক চাকৰিমুখী হৈ পৰিছে। প্ৰকৃতাৰ্থত শিক্ষাই এটি শিশুৰ সৰ্বাত্মক বিকাশ সাধন কৰা উচিত। বিদ্যালয়ৰ পাঠ্যপুথিৰ লগতে শিশুসকলে তেওঁলোকৰ দৃষ্টিভংগী উন্নত কৰি তুলিবলৈ আন গ্ৰন্থও অধ্যয়ন কৰা উচিত। শিশুসকলে নিজৰ দেশখনৰ বিষয়ে বিস্তৃত জ্ঞানৰ বাবে ভূগোল আৰু বুৰঞ্জী জনা উচিত,’’-ৰাজ্যপালগৰাকীয়ে কয়।
অধ্যাপক মুখীয়ে লগতে কয় যে ভাৰতৰ এক গৌৰৱময় ইতিহাস আছে।
‘’ শ্ৰীমন্ত শংকৰদেৱ, কবীৰ, তুলসীদাস, গুৰুনানকৰ দৰে মনীষীসকলৰ এই পৱিত্ৰ মাতৃভূমিত জন্ম হৈছিল। আনকি বিৱেকানন্দ যুৱ শিশুসকলৰ বাবে এক অনুপ্ৰেৰণা যিয়ে ভাৰতীয় সংস্কৃতি তথা ধৰ্মীয় পৰম্পৰাক বিশ্বত প্ৰচাৰ কৰিছিল আৰু যুৱ প্ৰজন্মৰ মাজত বিপুল প্ৰভাৱ পেলাইছে,’’-অধ্যাপক মুখীয়ে কয়।
ৰাজ্যপালগৰাকীয়ে দেশৰ চূকে-কোণে বিদ্যালয় পাতি শিক্ষা বিস্তাৰ কৰাৰ বাবে বিদ্যা ভাৰতীয়ে লোৱা প্ৰচেষ্টাক আদৰণি জনায়।
তেওঁ লগতে কয় যে বিদ্যা ভাৰতী শিক্ষাৰ ক্ষেত্ৰত এটা সুপৰিচিত নাম য’ত কেৱল দেশপ্ৰেমৰ দ্বাৰা উদ্বুদ্ধ কৰাই নহয়, তেওঁলোকক লগতে শাৰীৰিক, মানসিক, বৌদ্ধিক আৰু আধ্যাত্মিক প্ৰশিক্ষণৰ দ্বাৰা সকলোধৰণৰ প্ৰত্যাহ্বান গ্ৰহণ কৰিব পৰাকৈ গঢ়ি তোলা হয়।
উল্লেখযোগ্য যে ভাৰতীয় সংস্কৃতি আৰু পৰম্পৰাক সাৰোগত কৰি শিক্ষাৰ জৰিয়তে স্বাৱলম্বনৰ ধাৰণা গঢ়ি তোলা আৰু অসমৰ শিশুসকলৰ মাজত ভাতৃত্ববোধ গঢ়ি তোলাৰ উদ্দেশ্যেৰে ১৯৭৯ চনৰ ২১ এপ্ৰিলত শিশু শিক্ষা সমিতিক এটা পঞ্জীকৃত সংস্থা হিচাপে গঠন কৰা হৈছিল।
অসমৰ শিশু শিক্ষা সমিতিৰ উদ্যোক্তাসকলে সিদ্ধান্ত লৈছিল যে বিদ্যা বাৰতীৰ অধীনৰ অসমৰ বিদ্যালয়সমূহৰ নাম মহাপুৰুষ শংকৰদেৱৰ নামেৰে তেওঁৰ অনৱদ্য কৃতিৰ প্ৰতি শ্ৰদ্ধা জনাই ৰখা হ’ব।
বৰ্তমান ইয়াৰ অধীনত ৫৩৪ খন বিদ্যালয় স্থাপন কৰা হৈছে আৰু মুঠতে ১.৫ লাখ ছাত্ৰ-ছাত্ৰী ইয়াত অধ্যয়ন কৰি আছে।
