গাঁথনিৰ বহু ঠাইত ফাট মেলাৰ বাবে বজালী মহাবিদ্যালয়ৰ বিজ্ঞান ভৱনটো ভাঙি পৰাৰ উপক্ৰম হৈছে।
সংবাদ মাধ্যমৰ সৈতে হোৱা মত বিনিময়ত মহাবিদ্যালয়খনৰ অধ্যক্ষগৰাকীয়ে এনে পৰিস্থিতিৰ বিষয়ে জানিবলৈ দিয়ে।
বজালী মহাবিদ্যালয় বৰপেটা জিলাৰ আটাইতকৈ পুৰণি শিক্ষানুষ্ঠানসমূহৰ ভিতৰত অন্যতম। মহাবিদ্যালয়খন ১৯৫৫ চনত স্থাপিত হৈছিল আৰু ই ‘নাক’ৰ এ গ্ৰেড লাভ কৰিছে।
তিনি মহলীয়া বিজ্ঞান ভৱনটোত জীৱবিদ্যা, ৰসায়নশাস্ত্ৰ, পদাৰ্থবিদ্যা, ভূগোল, পৰিসংখ্যাৰ দৰে বিভিন্ন বিভাগসমূহ থকাৰ লগতে অধ্যক্ষৰ কাৰ্যালয় আৰু প্ৰশাসনীয় কাৰ্যালয়টো ইয়াত আছে।
মহাবিদ্যালয়খন স্থাপিত হোৱাৰ পিছতে নিৰ্মাণ কৰা ভৱনটোত দৈনিক কেইবাহাজাৰো ছাত্ৰ-ছাত্ৰী শ্ৰেণীত উপস্থিত হয়। উত্তৰ-পূৰ্বাঞ্চল ভূমিকম্প প্ৰৱন অঞ্চল হোৱালৈ লক্ষ্য ৰাখি ভৱনটোত দৈনিক শ্ৰেণীত উপস্থিত থকাটো এক ডাঙৰ চিন্তাৰ কাৰণ হৈ পৰিছে। ছাত্ৰ-ছাত্ৰী তথা শিক্ষকসকলে সদায় ভৱনটো ভাঙি পৰাৰ শংকা লৈ মহাবিদ্যালয়ত উপস্থিত হ’বলগীয়া হৈছে।
অধ্যক্ষগৰাকীয়ে কোনো অবাঞ্চিত ঘটনা সংঘটিত হোৱাৰ পূৰ্বে পদক্ষেপ গ্ৰহণ কৰাৰ বাবে বৰপেটাৰ উপায়ুক্তকে ধৰি বহু কেইটা উদ্ধৰ্তন কৰ্তৃপক্ষলৈ পত্ৰ লিখিছিল যদিও এতিয়ালৈকে কোনো সঁহাৰি লাভ কৰা নাই।
পিতৃ-মাতৃ তথা অভিভাৱকসকলেও ছাত্ৰ-ছাত্ৰী আৰু কৰ্মচাৰীসকলৰ সুৰক্ষাৰ বিষয়ে চিন্তা ব্যক্ত কৰিছে।
বজালী মহাবিদ্যালয়ৰ সাধাৰণ সম্পাদক ৰাকেশ চৌধুৰীয়ে কয়, ‘’মহাবিদ্যালয়খনত এটা সুস্থ শিক্ষাৰ পৰিৱেশ তেতিয়াহে সম্ভৱ যেতিয়া ছাত্ৰ-ছাত্ৰী আৰু শিক্ষকসকলে পৰ্যাপ্ত সা-সুবিধা লাভ কৰে। সেয়া কেৱল শিক্ষণ প্ৰক্ৰিয়াৰ লগতে সম্পৰ্কিত নহয়, কিন্তু সুৰক্ষা আৰু ভাল আন্ত:গাঁথনিৰ লগতো সম্পৰ্কিত। বিজ্ঞান ভৱনটো ছাত্ৰ-ছাত্ৰীৰ অধ্যয়নৰ বাবে উপযুক্ত নহয়।‘’
বজালী মহাবিদ্যালয়ৰ ছাত্ৰ-ছাত্ৰীসকলে ভৱনটো মেৰামতিৰ বাবে পদক্ষেপ গ্ৰহণ কৰিবলৈ চৰকাৰক অনুৰোধ জনাইছে।
