গুৱাহাটীৰ বৰঝাৰ বিমানবন্দৰত নতুনকৈ নিৰ্মাণ হ’ব সংহত টাৰ্মিনেল বিল্ডিং। ২৮ জানুৱাৰি তাৰিখে কেন্দ্ৰীয় অসামৰিক বিমান পৰিবহণমন্ত্ৰী অশোক গজপতি ৰাজুৱে সংহত টাৰ্মিনেল বিল্ডিংটোৰ আধাৰশিলা স্থাপন কৰিব।
উল্লেখযোগ্য যে বৰঝাৰৰ লোকপ্ৰিয় গোপীনাথ বৰদলৈ আন্ত:ৰাষ্ট্ৰীয় বিমানবন্দৰত ভাৰতীয় বিমান প্ৰাধিকৰণে নিৰ্মাণ কৰিব এই সংহত টাৰ্মিনেল বিল্ডিংটো।
সম্প্ৰতি দৈনিক ৭৫ খন বিভিন্ন ধৰণৰ উৰাজাহাজ উৰণ বা অৱতৰণ কৰা বিমান বন্দৰটোত এই নতুন টাৰ্মিনেল বিল্ডিংটো সম্পূৰ্ণ হৈ উঠাৰ ফলত বিমান উৰণৰ ক্ষমতা বৃদ্ধি পাব বুলি আশা কৰা হৈছে।
বৰঝাৰ বিমান বন্দৰত দুটাকৈ সংহত টাৰ্মিনেল বিল্ডিং আছে যদিও নতুনকৈ নিৰ্মাণ হ’বলগীয়া আন্ত:ৰাষ্ট্ৰীয় পৰ্যায়ৰ টাৰ্মিনেল ভৱনটোৰ ফলত দৈনিক বিমান উৰণৰ সংখ্যা ১০০তকৈ অধিক বৃদ্ধি পোৱাটো নিশ্চিত।
লক্ষ্যণীয় যে গুৱাহাটী বিমান বন্দৰত নিশা দহ বজাৰ পিছত বিমান উৰণ তথা অৱতৰণ বন্ধ হৈ থাকে। কিন্তু এই বছৰৰে ২৫ মাৰ্চৰ পিছৰ পৰা দিনে নিশাই বিমানৰ উৰণ-অৱতৰণ অব্যাহত থাকিব। দিনে-নিশাই বিমান সেৱা মুকলি ৰকাৰ বাবে অত্যাধুনিক ব্যৱস্থা গঢ়ি তোলা বুলিও বৰঝাৰৰ বিমান প্ৰাধিকৰণ কৰ্তৃপক্ষই জানিবলৈ দিছে।
ইপিনে বৰঝাৰ বিমানবন্দৰৰ টাৰ্মিনেল ভৱনটোৰ আধাৰশিলা স্থাপন কাৰ্যসূচী সুকলমে অনুষ্ঠিত কৰাৰ বাবে মঙলবাৰে কামৰূপ মহানগৰ জিলা উপায়ুক্ত এম অংগমুথুৰ অধ্যক্ষতাত এখন পৰ্যালোচনা সভা অনুষ্ঠিত হয়। বিমান কোঠ প্ৰাধিকৰণৰ শীৰ্ষ বিষয়ববীয়াৰ লগতে জিলা প্ৰশাসন আৰু আৰক্ষীৰ শীৰ্ষ বিষয়াসকল উপস্থিত থকা বৈঠকখন অনুষ্ঠিত হৈছিল খানাপাৰাত।
