আৰক্ষীয়ে চিৰাং-কোকৰাঝাৰ-ওদালগুৰিৰ বিভিন্ন ঠাইত অব্যাহত ৰাখিছে বিদ্ৰোহী বিৰোধী অভিযান। ঠিক সেইদৰে সোমবাৰে এক বিশেষ সূত্ৰৰ পৰা তথ্য লাভ কৰি ভাৰতীয় সেনা আৰু ওদালগুৰিৰ আৰক্ষীয়ে যুটীয়া ভাবে চলোৱা অভিযানত এগৰাকী এন ডি এফ বি(সং)ৰ মহিলা সদস্যাক আটক কৰিবলৈ সক্ষম হয়। আটক হোৱা মহিলা সদস্যাগৰাকী ওদালগুৰিৰ সাপখাইটি অঞ্চলৰ সুৰেশ বসুমতাৰীৰ জীয়ৰী মাইনাও বসুমতাৰী(২৪)বুলি আৰক্ষীয়ে চিনাক্ত কৰিছে।
প্ৰাপ্ত খবৰ অনুসৰি মাইনাও বসুমতাৰী এন ডি এফ বি(সং)ৰ বাংলাদেশ আৰু ম্যানমাৰত প্ৰশিক্ষণপ্ৰাপ্ত ৪০নং গোটৰ সদস্যা। জানিব পৰা মতে এন ডি এফ বি (সং) গোটৰ এই সদস্যা গৰাকীয়ে নিষিদ্ধ ঘোষিত সংগঠনটোত নতুন কেডাৰ ভৰ্তিৰ বাবে ওদালগুৰি অঞ্চলত অহৰহ প্ৰচেষ্টা অব্যাহত ৰাখিছিল। আৰক্ষীয়ে সদস্যাগৰাকীৰ সন্দেহজনক গতি বিধি নিৰীক্ষণ কৰি আছিল আৰু উপযুক্ত প্ৰমাণ পোৱাত সোমবাৰে আটক কৰে। আৰক্ষীয়ে সদস্যাগৰাকীৰ পৰা বহু আপত্তিজনক নথি-পত্ৰ উদ্ধাৰ কৰে আৰু বৰ্তমান অধিক তথ্য সংগ্ৰহৰ বাবে জেৰা অব্যাহত ৰাখিছে।
এন ডি এফ বি(সং)ৰ সদস্যা মাইনাও আৰক্ষীৰ জালত পৰা বাবে সংগঠনটোৰ বৃহৎ ক্ষতি বুলি আৰক্ষীয়ে ব্যক্ত কৰে। লক্ষ্যণীয় যে বিগত কিছু দিনত সেনা আৰু আৰক্ষীয়ে বিদ্ৰোহী বিৰোধী অভিযান তীব্ৰতৰ কৰি তোলা বাবে স্থানীয়লোকে সন্তুষ্টি প্ৰকাশ কৰিছে।
