স্বৰ্ণকন্যা হিমা দাসৰ বাসগৃহত প্ৰাক্তন আলফা ঐক্য মঞ্চৰ প্ৰতিনিধি
ফিনলেণ্ডত অনুষ্ঠিত ২০ অনূৰ্ধ্বৰ বিশ্ব এথলেটিকছ চেম্পিয়নশ্বিপত স্বৰ্ণ জয় কৰি দেশলৈ গৌৰৱ কঢ়িয়াই অনা হিমা দাসৰ সফলতাৰ প্ৰায় দুসপ্তাহ পাৰ হোৱাৰ পাছতো জন্মগাঁও ধিঙৰ কান্ধুলিমাৰীত প্ৰতিদিনেই বিৰাজ কৰিছে এক উদুলি-মুদুলি পৰিৱেশে।
ঠিক সেইদৰে মঙলবাৰে হিমাৰ বাসগৃহত উপস্থিত হয় প্ৰাক্তন আলফা ঐক্য মঞ্চৰ এটা প্ৰতিনিধি দল।
প্ৰতিনিধি দলটোৱে হিমাৰ পিতৃ-মাতৃক শুভেচ্ছা প্ৰদান কৰাৰ লগতে দেশৰ হৈ হিমাই কঢ়িয়াই অনা সাফল্যৰ বাবে পিতৃ-মাতৃক শৰাই আৰু গামোচা পিন্ধাই অভিনন্দন জনায়।
উল্লেখ্য যে হিমা দাসৰ পিতৃ-মাতৃক শুভেচ্ছা জ্ঞাপনৰ বাবে যোৱা প্ৰাক্তন আলফা ঐক্য মঞ্চৰ প্ৰতিনিধিৰ দলটোত কেন্দ্ৰীয় সাধাৰণ সম্পাদক লোহিত দেউৰী, কেন্দ্ৰীয় সম্পাদক মুন কুমাৰ বৰাৰ উপৰি বৰপেটা, কামৰূপ, নগাঁও আৰু মৰিগাঁও জিলাৰ প্ৰতিনিধি বৰ্গও উপস্থিত থাকে।
প্ৰতিনিধি দলটোৱে হিমাৰ পিতৃ-মাতৃক শুভেচ্ছা প্ৰদান কৰাৰ পাছতে কয় যে হিমাই সমগ্ৰ দেশৰ লগতে অসমবাসীৰো গৌৰৱ বৃদ্ধি কৰিলে। তাৰোপৰি ভৱিষ্যতেও অসমৰ মান উজলাই তুলিব পাৰিব বুলি উল্লেখ কৰি হিমাৰ উত্তৰোত্তৰ কামনা কৰে।