আজি গুৱাহাটীত অনুষ্ঠিত ৫৮ সংখ্যক নেশ্যনেল ইণ্টাৰ ষ্টেট এথলেটিকছ চেম্পিয়নশ্বিপৰ অন্তিম প্ৰতিযোগিতাত ৪০০ মিটাৰ দৌৰৰ প্ৰতিযোগিতাত ধিং এক্সপ্ৰেছ হিমা দাসে সোণৰ পদক লাভ কৰিছে।
হিমাই নিৰ্ধাৰিত ৪০০ মিটাৰৰ দূৰত্ব ৫১.১৩ ছেকেণ্ডত সমাপ্ত কৰে।
উল্লেখ্য যে যোৱা বুধবাৰে আনুষ্ঠিত ৫৮ সংখ্যক ৰাষ্ট্ৰীয় আন্তঃৰাজ্যিক ছিনিয়ৰ এথলেটিকছ চেম্পিয়নশ্বিপৰ ২০০ মিটাৰ দৌৰতো হিমাই সোণৰ পদক লাভ কৰিছিল।
হিমাই ২৩.১০ ছেকেণ্ডত এই দূৰত্বখিনি অতিক্ৰম কৰিবলৈ সক্ষম হোৱাত তেওঁৰ বাবে ইণ্ডোনেছিয়াত অনুষ্ঠিত হ’বলগীয়া এছিয়ান গেমছত যোগদানৰ পথ মুকলি হয়।
৫৮ সংখ্যক ৰাষ্ট্ৰীয় আন্তঃৰাজ্যিক ছিনিয়ৰ এথলেটিকছ চেম্পিয়নশ্বিপৰ উদ্বোধনী অনুষ্ঠানত উপস্থিত থকা অসমৰ মুখ্য মন্ত্ৰী সৰ্বানন্দ সোণোৱালে আশা প্ৰকাশ কৰিচিল যে অসমৰ গৌৰৱ হিমা দাসে ভৱিষ্যতে গৌৰৱ কঢ়িয়াই আনিব পাৰিব। তেওঁ লগতে অসমৰ আন আন উঠি অহা খেলুৱৈসকলৰ অন্তৰতো আশাৰ সঞ্চাৰ কৰিছিল।
উল্লেখ্য যে হিমা দাস হৈছে গুৱাহাটীত অনুষ্ঠিত ৰাষ্ট্ৰীয় আন্তঃৰাজ্যিক ছিনিয়ৰ এথলেটিকছ চেম্পিয়নশ্বিপৰ ব্ৰেণ্ড এম্বেছেডৰো।
সৰুসজাইৰ ইন্দিৰা গান্ধী ক্ৰীড়া চৌহদত উদ্বোধনী অনুষ্ঠানৰ পূৰ্বে আয়োজন কৰা সংবাদ মেলত উপস্থিত থকা কিংবদন্তি এথলিট পিটি উষাই হিমাক প্ৰশংসাৰে উপচাই দিছিল।
হিমা দাসৰ ঘৰ হৈছে নগাঁও জিলাৰ ধিঙত। তেওঁ চলিত বৰ্ষত অষ্ট্ৰেলিয়াৰ গল্ড ক’ষ্টত অনুষ্ঠিত ২১ সংখ্যক কমনৱেল্থ গেমছত ভাৰতক প্ৰতিনিধিত্ব কৰিছিল।
