ৰাজ্যৰ পাট-মুগা বস্ত্ৰৰ নতুন নতুন ডিজাইনেৰে এইবোৰক অনন্য ধৰণে উপস্থাপন কৰাত দীৰ্ঘদিন ধৰি মনোনিৱেশ কৰি অহা ডিজাইনাৰ সংযুক্তা দত্তলৈ বিৰল স্বীকৃতিৰে দাদা চাহেব ফাল্কে এক্সেলেন্স এৱাৰ্ড ২০১৮ আগ বঢ়োৱা হৈছে। এই কথা জানিব পৰা গৈছে ডিজাইনাৰ গৰাকীৰ এটা ঘনিষ্ঠ সূত্ৰৰ পৰা।
অসমৰ ঐতিহ্যপূৰ্ণ ৰেচম শিল্পৰ ক্ষেত্ৰখনক বিশ্ব দৰবাৰলৈ আগ বঢ়াই নিয়াৰ ক্ষেত্ৰত শিল্পীগৰাকীয়ে দীৰ্ঘদিন ধৰি কাম কৰি আহিছে। তেওঁৰ কামে অসমৰ হস্ততাঁত আৰু বস্ত্ৰশিল্পৰ উদ্যোগটোক নতুন পৰিসৰ দিছে।
সূত্ৰটোৱে জনোৱামতে, অহা ২১ এপ্ৰিলত মুম্বাইৰ ছেইণ্ট এন্ড্ৰিউজ প্ৰেক্ষাগৃহত অসমৰ ডিজাইনাৰগৰাকীক এই বঁটা প্ৰদান কৰা হ’ব। সংযুক্তা দত্তৰ উপৰি বলিউডৰ আন কেইবাগৰাকী তাৰকায়ো এই বঁটা লাভ কৰিছে।
উল্লেখযোগ্য যে সংযুক্তা দত্তই জনস্বাস্থ্য কাৰিকৰী বিভাগত অভিযন্তা হিচাপে চাকৰি কৰিছিল যদিও ২০১২ চনত চাকৰি এৰি ফেশ্বন ডিজাইনিঙৰ কামন মনোনিৱেশ কৰিছিল।
