ত্ৰিপুৰাৰ ১০,৩২৩ গৰাকী শিক্ষকলৈ সাময়িক ভাবে সকাহ দিলে উচ্চতম ন্যায়ালয়ে। এই শিক্ষক সকলৰ কাৰ্যকাল ছমাহৰ বাবে বৃদ্ধিৰ ৰায় প্ৰদান কৰে দেশৰ উচ্চতম ন্যায়ালয়ে। ৩১ ডিচেম্বৰত শিক্ষক সকলৰ কাৰ্যকালৰ শেষ সময়সীমা আছিল। সময় সীমা এবছৰৰ বৃদ্ধিৰ বাবে ত্ৰিপুৰা চৰকাৰে উচ্চতম ন্যায়ালয়ৰ আগত অনুৰোধ জনাইছিল। সেই অনুৰোধ মৰ্মে কালি উচ্চতম ন্যায়ালয়ে আৰু ছমাহৰ বাবে শিক্ষক সকলৰ কাৰ্যকাল বৃদ্ধি কৰিলে। কালি আগৰতলাত এই কথা সংবাদ মাধ্যমক জানিবলৈ দিয়ে ত্ৰিপুৰাৰ শিক্ষা মন্ত্ৰী তপন চক্ৰৱৰ্তীয়ে আৰু লগতে কয় চাকৰিৰ অনিশ্চিয়তাত ভূগি থকা শিক্ষক সকলে অহা ৬ মাহলৈ কিছু সকাহ পাব।
মন কৰিব লগীয়া যে উচ্চতম ন্যায়ালয়ৰ নিৰ্দেশ অনুযায়ী ১০,৩২৩ গৰাকী শিক্ষকে ৩১ ডিচেম্বৰৰ পৰা চাকৰি হেৰুৱাব লাগিব। ব্যাপক অনিয়ম প্ৰক্ৰিয়াৰে নিযুক্তি লাভ কৰিছিল শিক্ষকসকলে যাৰ বাবে উচ্চতম ন্যায়ালয়ে এই ৰায় প্ৰদান কৰিছিল। এই সময় সীমাৰ দিন চমু চাপি অহাৰ লগে লগে ত্ৰিপুৰা চৰকাৰৰ অনুৰোধ মৰ্মে ন্যায়াধীশ আদৰ্শ কুমাৰ গোয়েল আৰু উদয় উমেশ ললিতৰে গঠিত খণ্ড বিচাৰপীঠে মাত্ৰ ছমাহলৈ শিক্ষক সকলৰ কাৰ্যকাল বৃদ্ধি কৰে। লক্ষ্যণীয় যে সদৌ ত্ৰিপুৰা শিক্ষক সন্থাই যোৱা কিছুদিন পূৰ্বে তেওঁলোকৰ চাকৰিৰ নিশ্চয়তা প্ৰদানৰ দাবীত ৰাষ্ট্ৰীয় ঘাইপথ আৰু ৰেইল লাইন অৱৰোধ কাৰ্যসূচীৰে এক আন্দোলন কাৰ্যসূচীও ৰূপায়ণ কৰিছিল। এই গুৰুত্বপূৰ্ণ ৰায়ৰ পিছত শিক্ষক সকলে কি ভূমিকা গ্ৰহণ কৰে সেয়া লক্ষ্যণীয় হ’ব।
